ԵՐԵՎԱՆ, 12 սեպտեմբերի – Sputnik․ «Մանթաշյանց» գործարարների ակումբը գործարարների իրավունքների պաշտպանության օրենսդրական նախաձեռնություն է մշակել, որն ուղղված է խնդիրների լուծմանը 3 ուղղությամբ։ Լրագրողների հետ հանդիպման ժամանակ այս մասին ասաց ակումբի անդամ, «Էլ Էս Էյ» իրավաբանական ընկերության փաստաբան Արսեն Սարդարյանը։
«Առաջինն այն է, որ այսօրվա պրակտիկայում հարկային քրեական պատասխանատվություն, հետապնդում կարող է սկսվել ենթադրյալ 10 մլն դրամի հարկային պարտավորությունը չկատարելու համար։ Սա խնդրահարույց է և առաջարկում ենք կապել շրջանառության հետ։ Երկրորդը, որ տնտեսական գործունեությամբ զբաղվող անձանց կալանավորման գործիքը չարաշահվում է, բայց օրենսդրությամբ պիտի կարգավորվի։ Երրորդ խնդիրը, որ այս գործերով խուզարկությունների ժամանակ տեխնիկան առգրավվում է, ինչը երկար ժամանակով երբեմն զրկում է տնտեսվարողին գործունեության բնական գործընթացն ապահովելու հնարավորությունից», – ասաց Սարդարյանը։
Ակումբի համահիմնադիր նախագահ Վահրամ Միրաքյանը նշեց, որ հիմնական նպատակն է ապահովել գործարարների իրավունքների պաշտպանությունը ՀՀ Պետական եկամուտների կոմիտեի և Քննչական կոմիտեի հետ հարաբերություններում։ Նրա խոսքով` բիզնեսի նկատմամբ քրեական գործեր հարուցելը դրվել է հոսքագծի վրա։
«Հարկային համակարգի համար քրեական գործեր բացելը դարձել է ճնշում գործադրելու լծակ։ Այստեղ որևէ մեկը չի կենտրոնանում ազնվության կամ համաչափության վրա, այլ զուտ լծակ է` հաճախ հիմնված կասկածների վրա և չհիմնավորված։ Ինչո՞ւ չհիմնավորված, որովհետև հաճախ ՊԵԿ–ը պարտվում է, երբ գործ են հարուցում նրանց դեմ», – ասաց Վահրամ Միրաքյանը։
Ըստ Միրաքյանի` ՀՀ–ում միայն վերջին 2 տարվա ընթացքում 2000 գործ է բացվել բիզնեսի վրա, այսինքն` տարեկան միջինը 1000 գործ։ Նա համեմատեց այս վիճակագրությունը ԱՄՆ–ի հետ` նկատելով, որ ԱՄՆ–ի նման մեծ, մեր երկրից մի քանի անգամ խոշոր տնտեսություն ունեցող երկրում տարեկան միջինը 2500–3000 գործ է լինում։
«ՊԵԿ–ի կողմից չարաշահվում է, քանի որ փոխադարձ պատասխանատվություն չկա, այսինքն, երբ ՊԵԿ–ի տեսուչները նախնական հաշվարկում սխալվում են, որևէ մեկը պատասխանատվության չի ենթարկում նրանց», – ընդգծեց Վահրամ Միրաքյանը։
Բիզնես ակումբի անդամները կարծում են, որ պետք է սահմանել արդար և կանխատեսելի մեխանիզմներ` հարկային և տնտեսական վեճերի դեպքում, քանի որ քրեական գործերը վնասում են ներդրումներին։ Հակառակ դեպքում, ըստ Վահրամ Միրաքյանի, բիզնեսի նկատմամբ վարվող քաղաքականությունը «պետական ռեկետ է» դառնում։