ԵՐԵՎԱՆ, 3 սեպտեմբերի – Sputnik. Ազգային ժողովի «Քաղաքացիական պայմանագիր» խմբակցության պատգամավոր, խոշոր գործարար Խաչատուր Սուքիասյանի ընտանիքին պատկանող «Սիլ պլազա» բիզնես կենտրոնի տարածքը չի վերադարձվի պետությանը։ Այս մասին հայտնում է «Հետքը»` նշելով, որ վերաքննիչ Հակակոռուպցիոն դատարանը սեպտեմբերի 2-ին կայացրած վճռով մերժել է ՀՀ գլխավոր դատախազության բողոքը և չի բեկանել առաջին ատյանի դատարանի վճիռը։
Ըստ կայքի` Վերաքննիչ դատարանի դատավորներ Գոռ Հարությունյանը, Հայարփի Զարգարյանը և Գոռ Թորոսյանը դատախազության բողոքը գրավոր ընթացակարգով 6 ամիս քննելուց հետո վճռել են, որ այն ենթակա է մերժման, իսկ Հակակոռուպցիոն առաջին ատյանի դատարանի 2025 թ․-ի հունվարի որոշումը թողնել ուժի մեջ։ Տարեսկզբին առաջին ատյանի դատարանը որոշել էր դատախազության հայցը մերժել՝ կիրառելով հայցային վաղեմություն (ըստ վճռի՝ դատախազությունը բաց է թողել խախտված իրավունքը պաշտպանելու՝ օրենքով սահմանված ժամկետը)։
Գլխավոր դատախազությունից կայքին հայտնել են, որ վերաքննիչ Հակակոռուպցիոն դատարանի վճիռի դեմ վճռաբեկ բողոք են ներկայացնելու։
Հիշեցնենք, որ 2022 թվականին ՀՀ դատախազությունը հայց էր ներկայցրել վարչական դատարան` վիճարկելու համար Երևանի կենտրոնում գտնվող բիզնես կենտրոնի («Սիլ պլազա» - խմբ.) սեփականաշնորհման օրինականությունը։