ԵՐԵՎԱՆ, 1 սեպտեմբերի – Sputnik․ Աֆղանստանում տեղի է ունեցել ուժեղ երկրաշարժ, որի հետևանքով կա առնվազն 500 զոհ, ավելի քան 1000 տուժած։ Տեղեկությունը հայտնում է NBC հեռուստաալիքը։
Աֆղանստանի առողջապահության նախարարության մամուլի քարտուղար Շարաֆաթ Զամանը հայտարարել է, որ իշխանությունները լայնածավալ փրկարարական գործողություններ են սկսել, հարյուրավոր մարդիկ մոբիլիզացվել են տուժածներին օգնելու համար:
Իր հերթին Tolo news լրատվական պորտալը, վկայակոչելով տարերային աղետների պատրաստվածության գծով նահանգային վարչության ներկայացուցչին, հայտնում է, որ աղետի հետևանքով ամենից շատ տուժել են Նուրգալ, Ծավկայ, Վատապուր, Մանուգայ և Չապա Դարա հահանգները:
Ավելի վաղ Եվրոպական միջերկրածովյան սեյսմոլոգիական կենտրոնը (EMSC) հայտնել էր, որ 6,2 մագնիտուդ ուժգնությամբ երկրաշարժ է տեղի ունեցել Աֆղանստանի Ջալալաբադ քաղաքից 57 կմ հյուսիս-արևելք, օջախը 35 կմ խորության վրա է: Ավելի ուշ EMSC-ն հայտնեց, որ երկրաշարժի էպիկենտրոնը եղել է Ջալալաբադից 50 կիլոմետր հեռավորության վրա, իսկ օջախի խորությունը հասնում է մինչև 10 կիլոմետրի: Միաժամանակ, ԱՄՆ Երկրաբանական ծառայությունը (USGS) էպիկենտրոնից մինչև Ջալալաբադ հեռավորությունը գնահատել է 27 կիլոմետր, օջախի խորությունը՝ 8 կիլոմետր, մագնիտուդը՝ 6,0: