ԵՐԵՎԱՆ, 30 օգոստոսի – Sputnik. «Վիլլերոյ & Բոխ» խանութ–սրահում հայտնաբերվել են վտանգավոր մանկական բաժակներ։ Այս մասին ահազանգում է ՀՀ շուկայի վերահսկողության տեսչական մարմինը։
Տեսչական մարմինը տեղեկացնում է, որ Երևան քաղաքի Աբովյան 22 հասցեում գործող այս խանութ–սրահը վաճառքի է հանել և իրացրել երեխաների համար նախատեսված վտանգավոր բաժակներ։ Խոսքը վերաբերում է «Քաղցած արջի պես», «Ուրախ արջի պես», «Մռնչա առյուծի պես», «Քայլիր փղի պես» անվանումներով հավաքածուներին։
«Բաժակների ապակին կարող է կոտրվել, եթե ներսից ճնշում գործադրվի, ինչը կարող է հանգեցնել վնասվածքների»,– ընդգծել են տեսչական մարմնից։
Պարզվել է, որ որակի շեղման պատճառը բաժակների արտադրության ընթացքում առաջացած չափազանց մեծ ճնշումն է՝ չմշակված ապակու ձուլման հետևանքով։
ՀՀ Շուկայի վերահսկողության տեսչական մարմինը ապրանքը գնած սպառողներին, հորդորում է կապ հաստատել Տեսչական մարմնի հետ, այնուհետև վերադարձնել բաժակները՝ հետ ստանալով ապրանքի արժեքը։