ԵՐԵՎԱՆ, 25 օգոստոսի - Sputnik. Սիրիայի հարավում գտնվող Սուվեյդա նահանգի դրուզների համայնքը միջազգային հանրությանը կոչ է արել աջակցել իրեն Դամասկոսից անկախ ինքնավար շրջան ստեղծելու և դրա անվտանգությունն ապահովելու հարցում, հաղորդում է սիրիական Syria TV հեռուստաալիքը:
«Կոչ ենք անում բոլոր ազատ երկրներին և ժողովուրդներին կանգնել մեր՝ Սուվեյդայի դրուզների կողքին՝ ինքնավար շրջանի հռչակման և մեր պաշտպանության նպատակով»,-հայտարարել է Սիրիայի դրուզական համայնքի առաջնորդ, շեյխ Հիքմաթ Ալ Հիջրին:
Օգոստոսի 16-ին Սուվեյդայում լայնածավալ ցույցեր են անցկացվել «Ինքնորոշման իրավունք» կարգախոսով։ Օգոստոսի 23-ին Սուվեյդա նահանգում դրուզների ինքնապաշտպանության զինված կազմավորումները հայտարարել են նոր ձևավորված ռազմականացված կառույց, այսպես կոչված «Ազգային պաշտպանություն» մտնելու մասին՝ միասնական հրամանատարության ներքո: Դրուզների «Ազգային պաշտպանության» ստեղծումը տեղի է ունեցել Հիքմաթ Ալ Հիջրիի նախաձեռնությամբ։
Հիշեցնենք, որ հուլիսի 13-ին հայտնի էր դարձել, որ սիրիական զինված խմբավորումների հարձակվել են Էս-Սուվեյդա նահանգի դրուզների (էթնիկ խմբեր, որոնց աջակցում է Իսրայելի կառավարությունը՝ խմբ.) մի շարք բնակավայրերի վրա, ինչի հետևանքով փակվել էր նաև նահանգը Դամասկոսին կապող մայրուղին: Խաղաղ բնակչությանը պաշտպանելու համար զինված ավազակախմբերի հետ կռվի մեջ էին մտել դրուզների ինքնապաշտպանական ջոկատները։
Դրուզներին աջակցելու նպատակով Իսրայելի պաշտպանության բանակը հուլիսի 16-ին հարված է հասցրել Դամասկոսում Սիրիայի գլխավոր շտաբի մուտքի դարպասին: Սիրիայի հետ սրման ֆոնին ՑԱԽԱԼ-ը նաև հայտարարել է Գոլանի բարձունքներ երկու դիվիզիա տեղափոխելու պատրաստակամության մասին:
Հուլիսի 19-ին Թուրքիայում ԱՄՆ դեսպան և Սիրիայի հարցով ԱՄՆ հատուկ բանագնաց Թոմ Բարաքը հայտնել է, որ Իսրայելի վարչապետ Բենյամին Նեթանյահուն և Սիրիայի անցումային շրջանի նախագահ Ահմեդ աշ Շարաան համաձայնել են հրադադար հաստատել: