ԵՐԵՎԱՆ, 22 օգոստոսի – Sputnik․ «Սրբազան պայքարի» գործով անցնող գործարար Տիգրան Գալստյանի կալանքի ժամկետը երկարաձգվեց 3 ամսով։ Նման որոշում կայացրեց Երևան քաղաքի առաջին ատյանի ընդհանուր իրավասության դատարանի դատավոր Կարեն Ֆարխոյանը։
Նույնատիպ որոշում կայացվեց նաև պատգամավոր Արթուր Սարգսյանի վարորդի՝ Կարո Օկումուշյանի համար. նա կալանքի տակ կմնա մինչև նոյեմբերի 25-ը։
«Կարոն իր ամբողջ կյանքում քաղաքականությամբ չի զբաղվել, կյանքում «Ֆեյսբուքում» գրառում չի արել, հայրենասեր ու արժանապատիվ, բայց քաղաքականությունից հեռու մարդ է։ Իր աշխատանքի բնույթից ելնելով՝ որտեղ եղել եմ ես, այնտեղ եղել է ինքը»,- ասաց Սարգսյանը՝ հավելելով, որ նույն տրամաբանությամբ Բագրատ սրբազանի տանը եղել են նաև իր կինն ու երեխաները, նրա՞նք էլ պետք է կալանավորվեն։
Դատարանը որոշեց 3 ամսով երկարաձգել նաև ակտիվիստներ Մովսես Շարբաթյանի և Տիգրան Թոփալյանի կալանքի ժամկետը։
Հիշեցնենք` օգոստոսի 20-ին դատարանի որոշմամբ 3-ամսով երկարաձգվեց Լիդյա Մանթաշյանի կալանքի ժամկետը, հաջորդ օրը` Բագրատ սրբազանի, Վահագն Չախալյանի, Արթուր Սարգսյանի, Արման Իսրայելյանի և Արսեն Ղազարյանի կալանքի ժամկետը։
44-օրյա պատերազմում զոհված ազատամարտիկ Հակոբ Ռոստոմյանի հոր՝ Արա Ռոստոմյանի խափանման միջոց կալանքը փոխարինվեց տնային կալանքով՝ համակցված բացակայելու արգելքով։ Նրան թույլատրվեց նաև շաբաթական առնվազն 2 անգամ Պրոբացիայի ծառայության կամ ոստիկանության ուղեկցությամբ այցելել «Եռաբլուր» զինվորական պանթեոն։
Ըստ ՀՀ քննչական կոմիտեի` «Սրբազան պայքար» շարժման մասնակիցները և ղեկավարները պլանավորել էին ՀՀ-ում իրականացնել ահաբեկչական և իշխանությունը զավթելուն ուղղված գործողություններ։