ԵՐԵՎԱՆ, 17 օգոստոսի — Sputnik. Քաղաքագետ, ԱԺ նախկին պատգամավոր Ռուբեն Հակոբյանի ինքնազգացողությունը ՔԿՀ-ում վատացել է։ Այս մասին հայտնել է նրա որդին՝ Երևանի ավագանու անդամ Սամվել Հակոբյանը:
«Անցած գիշեր, ժամը 2–ից–3–ի սահմաններում տեղեկացա, որ հորս վիճակը վատացել է տեղափոխում են «Էրեբունի» բժշկական կենտրոն։ ԲԿ–ում հնարավորություն եմ ունեցել հորս 1 վայրկյան տեսնել, երբ նրան սայլակով հետ էին տանում, որ նստեցնեն ՔԿՀ–ի մեքենայի մեջ։ Սա խայտառակություն է, որ 70 տարեկան քաղաքական գործչին կալանավորել են քաղաքական կարծիքն արտահայտելու համար: Հիմա , երբ մարդն իրեն վատ է զգում ոչ մարդկային պայմաններում, տանում են հիվանդանոց, որտեղ ասում են ճնշումը շատ բարձր է, սթրեսային վիճակում է, այդ փաստը բավարար չէր այս մարդկանց համար, որպեսզի հայրս մնար հիվանդանոցում»,–ֆեյսբուքյան ուղիղ եթերում ասել է Սամվել Հակոբյանը։
Նա նշել է, որ կիրակի համապատասխան մասնագետը տեղում չի եղել, ուստի որոշել են Ռուբեն Հակոբյանին տեղափոխել ՔԿՀ, և զննման համար կրկին հիվանդանոց բերել երկուշաբթի։
«Հայրս երևի Բեն Լադենն էր, աշխարհի հանցագործը, որ մնար հիվանդանոցում մեծ խնդիրներ կստեղծեր»,–ասել է նա։
Հիշեցնենք` ԱԺ նախկին պատգամավորը հուլիսի 18–ին ձերբակալվեց 2025 թվականի հուլիսի 1-ին զանգվածային լրատվության միջոցով հարցազրույց տալու ընթացքում «իշխանությունը զավթելուն ուղղված հրապարակային կոչ հնչեցնելու համար»։
Ռուբեն Հակոբյանը 2 ամսով կալանավորվեց հուլիսի 19–ին։
Հուլիսի 22-ին նա կալանավայրից նամակ հղեց` հայտարարելով, որ չի զղջում հեռուստահաղորդման ընթացքում տված քաղաքական գնահատականների և հայտարարությունների համար, որոնց համար էլ նրան ազատությունից զրկել են։