ԵՐԵՎԱՆ, 16 օգոստոսի – Sputnik. Սուվեյդայում (Սիրիա) անցկացվել են անկախության պահանջով զանգվածային ցույցեր։ Այս մասին հայտնում են Մերձավոր Արևելքի թեմաներ լուսաբանող լրատվական միջոցները։
Նշվում է, որ ակցիան կազմակերպվել է Արժանապատվության հրապարակում ՝ «Ինքնորոշման իրավունք» հիմնական կարգախոսի ներքո։
Որոշ տեղեկությունների համաձայն` անցումային կառավարության ուժերը և դրանց հետ կապված խմբավորումները նախորդ գիշեր անկանոն կրակ են բացել Նաջրան գյուղի վրա: Գնդակոծվել են նաև Ալ Մաջդալ և Վալգա գյուղերը։
Հիշեցնենք` հուլիսի 13-ին հայտնի դարձավ, որ զինված խմբավորումները հարձակվել են Սուվեյդա նահանգի մի շարք բնակավայրերի վրա, որտեղ հիմնականում դրուզներ են ապրում։ Խաղաղ բնակչությանը պաշտպանելու համար կռվի դուրս եկան դրուզների ինքնապաշտպանական ջոկատները (Իսրայելի կառավարության աջակցությամբ)։ Սիրիայի պաշտպանության նախարարության տվյալներով՝ բախումների ժամանակ ավելի քան 30 մարդ է սպանվել, ավելի քան 100-ը` վիրավորվել։
Հուլիսի 15-ին Սիրիայի պաշտպանության նախարարությունը հայտարարեց, որ ներքին գործերի նախարարության ուժերի հետ զորք է մտցնում Սուվեյդա քաղաք, գործողության նպատակը քաղաքը անօրինական զինված խմբավորումներից մաքրելն է։
Իշխանությունները հակամարտության բոլոր կողմերին կոչ արեցին համագործակցել բանակի և ներքին անվտանգության ուժերի հետ և զսպվածություն ցուցաբերել՝ ընդգծելով, որ իրավիճակի սրացումը միայն կխորացնի խաղաղ բնակչության տառապանքները։
Թուրքիայում ԱՄՆ դեսպան և Սիրիայի հարցով ԱՄՆ հատուկ բանագնաց Թոմ Բարաքը հուլիսի 19-ին հայտնեց, որ Իսրայելի վարչապետ Բենիամին Նեթանյահուն և Սիրիայի անցումային շրջանի նախագահ Ահմեդ աշ Շարաան համաձայնել են հրադադար հաստատել: