ԵՐԵՎԱՆ, 8 օգոստոսի – Sputnik, Խաչիկ Չախոյան. Կոնֆերենցիաների լիգայի որակավորման երկրորդ փուլի առաջին խաղում «Արարատ-Արմենիան» մրցակցի հարկի տակ 1։4 հաշվով պարտվեց Պրահայի «Սպարտային»։
«Սպարտան» եվրագավաթներում հանդես գալու անհամեմատ ավելի մեծ փորձ ունի, և մասնավորապես սեփական հարկի տակ չեխերը հաղթողի հիմնական հավակնորդ էին համարվում «Արարատ-Արմենիայի» հետ խաղում։ Ճիշտ է` խաղի սկիզբը խոստումնալից էր մեր թիմի համար, ու Խուան Բալանտայի խփած գնդակը շատ կարևոր էր, բայց նույնիսկ հաշվի մեջ առաջ անցնելուց հետո էլ զգացվում էր, որ մրցակիցը շատ ուժեղ է ու հաղթելը շատ դժվար կլինի։
Իսկ երբ Պատրիկ Վիդրան 25-րդ րոպեին խփեց պատասխան գնդակը, վերը նշվածը հաստատվեց։
«Արարատ-Արմենիան» հիմնականում պաշտպանվում էր, բայց դաշտի տերերի ճնշումը գնալով մեծանում էր, ու 33-րդ րոպեին Կայրինենն արդեն առաջ մղեց «Սպարտային»։ Առաջին կեսում «Սպարտան» առավելություն ուներ ու կարողացավ օգտագործել դա։
Ընդմիջումից հետո հայկական թիմի գործողություններում ավելի համարձակություն նկատվեց, բայց ամեն դեպքում չեխական թիմը բարձր կարգ ունի, և կարողացավ ևս մեկ անգամ գրավել մեր թիմի դարպասը։ Յան Կուխտան գլխի հարվածով եզրափակեց եզրային փոխանցումը։
Ամենակարևորն այն է, որ «Արարատ-Արմենիան» վատ ֆուտբոլ չցուցադրեց, ու դրվագներով նույնիսկ բավականին լավ տեսք ուներ մերոնց խաղը։ Չմոռանանք, որ մրցակիցն իրոք շատ ուժեղ ու բարձրակարգ թիմ էր։ Բայց, ինչպես տեսանք, նույնիսկ լավ խաղ ցուցադրելով հնարավոր է պարտվել, այն էլ խոշոր հաշվով։
Հանդիպման վերջը դրեց Վելկո Բիրմանչևիչը, որն իրացրեց 11– մետրանոց հարվածը՝ 4։1 հաշվով հաղթանակ բերելով «Սպարտային»։
Պատասխան խաղը կկայանա Երևանում մեկ շաբաթ անց։ Ռևանշի հասնել «Արարատ-Արմենիան» կարող է, բայց դիմակայությունում հաղթանակի հասնելը գրեթե անհավանական է թվում։