Մոսկվան գնահատել է Կիևի հետ բանակցությունների հեռանկարը և ԱՄՆ–ի դերը կարգավորման գործում

ԵՐԵՎԱՆ, 4 օգոստոսի – Sputnik. Ռուսաստանը չի բացառում նախագահ Վլադիմիր Պուտինի և Ուկրաինայի առաջնորդ Վլադիմիր Զելենսկու միջև հանդիպման հնարավորությունը։ Այս մասին հայտնել է ՌԴ նախագահի մամուլի քարտուղար Դմիտրի Պեսկովը։

Նրա խոսքով՝ նման հանդիպում կարող է տեղի ունենալ, երբ փորձագիտական մակարդակով անհրաժեշտ աշխատանքն ավարտվի։

Այս ֆոնին Մոսկվան շարունակում է պատրաստվել Մերձավոր Արևելքի գծով ԱՄՆ նախագահի հատուկ դեսպանորդ Սթիվ Ուիտկոֆի հնարավոր այցին։ Դմիտրի Պեսկովը ընդգծել է ամերիկյան կողմի հետ երկխոսության կարևորությունը.

«Մենք միշտ ուրախ ենք տեսնել պարոն Ուիտկոֆին Մոսկվայում, և այդ շփումները համարում ենք կարևոր, բովանդակալից և շատ օգտակար»։

ԱՄՆ նախագահ Դոնալդ Թրամփն ավելի վաղ հայտնել էր, որ Ուիտկոֆի այցը Ռուսաստան կարող է տեղի ունենալ օգոստոսի 6-ին կամ 7-ին: Այցը նախատեսված էր դիվանագետի Իսրայել այցից հետո, սակայն հանգստյան օրերին այցը չկայացավ։

Պեսկովը նշել է, որ Ուկրաինայի հարցում ԱՄՆ միջնորդական ջանքերը կարևոր են բանակցային ընթացիկ գործընթացի համար.

Նրա խոսքով՝ Մոսկվայի և Վաշինգտոնի միջև երկխոսությունը պահպանվում է՝ չնայած միջազգային բարդ իրավիճակին.

«Երկխոսությունը շարունակվում է, Միացյալ Նահանգները շարունակում է միջնորդական ջանքերը՝ ուկրաինական կարգավորման ուղի փնտրելով», – ընդգծել է Պեսկովը։

Նախագահի մամուլի քարտուղարը մեկնաբանել է նաև ԱՄՆ առաջնորդի վերջերս արված հայտարարությունները, այդ թվում՝ միջուկային թեմայի վերաբերյալ։ Պեսկովը հիշեցրել է, որ Ռուսաստանը ելնում է հիմնական պոստուլատից. միջուկային պատերազմում հաղթող չի կարող լինել։

Կրեմլը, նրա խոսքով, ավանդաբար զուսպ է միջուկային անվտանգության թեմայով իր արտահայտություններում և կոչ է անում միջազգային երկխոսության բոլոր մասնակիցներին առավելագույն զգուշություն ցուցաբերել միջուկային հռետորաբանության հարցում։