ԵՐԵՎԱՆ, 1 օգոստոսի – Sputnik. Հայաստանում անհուսալի պարտապանների մեծամասնությանը վարկային համաներումները չեն օգնել. նրանք շարունակում են վարկեր վերցնել ու խնդիրներ ունենալ բանկերի հետ։ Այս մասին այսօր մամուլի ասուլիսի ժամանակ ասաց ՀՀ բանկերի միության նախագահ Դանիել Ազատյանը՝ մեկնաբանելով փետրվարին մեկնարկած անհուսալի պարտապանների աջակցության ծրագիրը։
Ազատյանի խոսքով` վարկային համաներումների հետ կապված պետք է զգուշություն ցուցաբերել, որպեսզի քաղաքացիների մոտ վարկերը չմարելու սովորություն չձևավորվի:
«Այս մասին է վկայում նախորդ համաներման փորձը։ Մի քանի տարի առաջ համաներում հայտարարվել էր ոչ մեծ պարտքեր ունեցող` մինչև 50 հազար դրամ, անձանց համար, բայց ստուգելով անհուսալի պարտապանների ցուցակները` այն ժամանակ և հիմա էլ, պարզ է դառնում, որ շատ դեպքերում նույն մարդիկ են»,– տեղեկացրեց նա։
Ազատյանի խոսքով` ներկայիս ծրագիրը չի կարելի համաներում անվանել, քանի որ վարկառուները պետք է մարեն բոլոր տոկոսները, մայր գումարը և տույժերի ու տուգանքների 20 տոկոսը:
Հիշեցնենք` կառավարության աջակցության ծրագիրը հաստատվեց 2024 թվականի դեկտեմբերին։ Անհուսալի վարկեր ունեցող անձանց տնտեսական ակտիվության խթանման միջոցառման շահառուների աշխատավարձից բռնագանձվող գումարը 20% է՝ 24 ամիս ժամկետով։ Ըստ ՀՀ կենտրոնական բանկի տվյալների` 2024թ հոկտեմբերի 1-ի դրությամբ անհուսալի վարկ ունեցող ֆիզիկական անձ վարկառուների թիվը շուրջ 341 հազար է, իսկ նրանց վարկային բեռը՝ շուրջ 642 մլրդ դրամ։
Կառավարության ծրագրով շահառու կարող են լինել անձինք, որոնց վարկն արդեն 3 տարի է, ինչ անհուսալի է և չի գերազանցում 1 մլն դրամը: Ծրագրին դիմող քաղաքացու աշխատանք ունենալը պարտադիր պայման է։ Դիմումների ընդունումը մեկնարկել է 2025 թվականի փետրվարից, վերջնաժամկետը 2026 թ.-ի հունվարի 31–ն է։