ԵՐԵՎԱՆ, 30 հուլիսի – Sputnik. Դամասկոսի ուղարկած մարդասիրական օգնությունը չի հասնում Սիրիայի հարավում գտնվող Սուվեյդա քաղաքի բնակիչներին, սննդի և առաջին անհրաժեշտության պարագաների պակասի պատճառով հումանիտար իրավիճակը մոտենում է կրիտիկականի: ՌԻԱ Նովոստիին այդ մասին հայտնել են Սուվեյդայի բնակիչները։
Սիրիայի իշխանությունները պաշտոնապես հայտարարել են, որ ավելի քան 5 ավտոշարասյուն մարդասիրական բեռ են ուղարկել Սուվեյդայի բնակիչների համար, վերջին շարասյունն այսօր է ուղևորվել հարավ: Ըստ հաղորդագրության` բեռնատարները բնակիչների համար սնունդ, վառելիք, ալյուր, դեղորայք և ջրի պոմպեր են տանում:
«Որևէ մարդասիրական օգնության մասին խոսք չկա, մենք խեղդող պաշարման մեջ ենք։ Թույլ չեն տալիս նույնիսկ մեկ լիտր բենզին անցկացնել։ Բենզատարների միայն փոքր մասին են թույլ տվել վառելիք հասցնել հացի արտադրամասերի համար», - գործակալությանը պատմել է տեղի բնակիչը։
Գործակալության զրուցակցի խոսքով՝ մարդասիրական օգնությունը, որի մասին հայտարարում են իշխանությունները, չի հասնում բնակիչներին, միաժամանակ փակ են քաղաքի բոլոր խանութներն ու շուկաները։
Մեկ այլ քաղաքացի էլ ասել է, որ Սուվեյդան շրջափակման մեջ է մոտ 15 օր։
«Քաղցկեղի դեմ պայքարի ասոցիացիան կոչ է արել անհապաղ օգնություն ցուցաբերել, դեղորայք չկա։ Սնունդ մենք չենք տեսել։ Սուվեյդան կարելի է համարել աղետի գոտի», - ասել է նա։
Հիշեցնենք` հուլիսի 13-ին հայտնի դարձավ, որ զինված խմբավորումները հարձակվել են Սուվեյդա նահանգի մի շարք բնակավայրերի վրա, որտեղ հիմնականում դրուզներ են ապրում։ Խաղաղ բնակչությանը պաշտպանելու համար կռվի դուրս եկան դրուզների ինքնապաշտպանական ջոկատները (Իսրայելի կառավարության աջակցությամբ)։ Սիրիայի պաշտպանության նախարարության տվյալներով՝ բախումների ժամանակ ավելի քան 30 մարդ է սպանվել, ավելի քան 100-ը` վիրավորվել։
Հուլիսի 15-ին Սիրիայի պաշտպանության նախարարությունը հայտարարեց, որ ներքին գործերի նախարարության ուժերի հետ զորք է մտցնում Սուվեյդա քաղաք, գործողության նպատակը քաղաքը անօրինական զինված խմբավորումներից մաքրելն է։
Իշխանությունները հակամարտության բոլոր կողմերին կոչ արեցին համագործակցել բանակի և ներքին անվտանգության ուժերի հետ և զսպվածություն ցուցաբերել՝ ընդգծելով, որ իրավիճակի սրացումը միայն կխորացնի խաղաղ բնակչության տառապանքները։
Թուրքիայում ԱՄՆ դեսպան և Սիրիայի հարցով ԱՄՆ հատուկ բանագնաց Թոմ Բարաքը հուլիսի 19-ին հայտնեց, որ Իսրայելի վարչապետ Բենիամին Նեթանյահուն և Սիրիայի անցումային շրջանի նախագահ Ահմեդ աշ Շարաան համաձայնել են հրադադար հաստատել: