ԵՐԵՎԱՆ, 23 հուլիսի – Sputnik. Սիրիան պաշտոնապես օգնություն է խնդրել Թուրքիայից «իր պաշտպանական ներուժը ամրապնդելու և ահաբեկիչների դեմ պայքարելու» համար։ Այս մասին հաղորդում է «Anadolu»-ն՝ հղում անելով Թուրքիայի պաշտպանության նախարարության աղբյուրին։
«Սիրիայի ղեկավարությունը պաշտոնապես օգնություն է խնդրել Թուրքիայից՝ իր պաշտպանական ներուժը ամրապնդելու և բոլոր ահաբեկչական խմբավորումների, առաջին հերթին՝ «Իսլամական պետության» (արգելված է ՌԴ–ում – խմբ.) դեմ պայքարելու համար», - ասվում է հաղորդագրության մեջ։
Խնդրանքի համաձայն Թուրքիայի պաշտպանության նախարարությունը աշխատում է «ՍԱՀ–ի պաշտպանական ներուժը ամրապնդելու» համար ուսուցում, խորհրդատվություն և տեխնիկական աջակցություն ապահովելու ուղղությամբ։
ՊՆ–ից ընդգծել են, որ Անկարայի գլխավոր նպատակը «Սիրիայի տարածքային ամբողջականությունը և քաղաքական միասնությունը պահպանելն է»։
Հիշեցնենք` հուլիսի 13-ին հայտնի դարձավ, որ զինված խմբավորումները հարձակվել են Սուվեյդա նահանգի մի շարք բնակավայրերի վրա, որտեղ հիմնականում դրուզներ են ապրում։ Խաղաղ բնակչությանը պաշտպանելու համար կռվի դուրս եկան դրուզների ինքնապաշտպանական ջոկատները (Իսրայելի կառավարության աջակցությամբ)։ Սիրիայի պաշտպանության նախարարության տվյալներով՝ բախումների ժամանակ ավելի քան 30 մարդ է սպանվել, ավելի քան 100-ը` վիրավորվել։
Դրուզներին աջակցելու նպատակով Իսրայելի պաշտպանության բանակը հուլիսի 16-ին հարված հասցրեց Դամասկոսում Սիրիայի գլխավոր շտաբի տարածքին: Սիրիայի հետ սրման ֆոնին Իսրայելի բանակը նաև հայտարարեց Գոլանի բարձունքներ երկու դիվիզիա տեղափոխելու պատրաստակամության մասին:
Հուլիսի 19-ին Թուրքիայում ԱՄՆ դեսպան և Սիրիայի հարցերով ԱՄՆ հատուկ բանագնաց Թոմ Բարաքը հայտարարեց, որ Իսրայելի վարչապետ Բենիամին Նեթանյահուն և Սիրիայի ժամանակավոր նախագահ Ահմեդ ալ Շարաան համաձայնության են եկել հրադադարի շուրջ։