ԵՐԵՎԱՆ, 22 հուլիսի – Sputnik. Նախքան Ռուսաստանի և Ուկրաինայի միջև բարձրագույն և բարձր մակարդակներով հանդիպումների հնարավորության մասին խոսելը, դեռ շատ անելիք կա։ Այս մասին լրագրողներին հայտարարել է ՌԴ նախագահի մամուլի քարտուղար Դմիտրի Պեսկովը։
Ավելի վաղ Մոսկվայի աղբյուրը ՌԻԱ Նովոստիին հայտնել էր, որ Ռուսաստանի և Ուկրաինայի միջև բանակցությունների նոր փուլը տեղի կունենա հուլիսի24-25-ը։
«Մինչև բարձր և բարձրագույն մակարդակով որևէ հանդիպման հնարավորության մասին առարկայական խոսելը նախ պետք է շատ աշխատել», – ասել է ՌԴ նախագահի խոսնակը։
Նա հույս է հայտնել, որ Ուկրաինայի հետ բանակցությունների նոր փուլը կկայանա այս շաբաթ։
«Հույս ունենք, որ դա կլինի այս շաբաթ (Ուկրաինայի հետ բանակցությունների երրորդ փուլը - խմբ.), պատրաստ լինելուն պես կհաղորդենք ամսաթվերի վերաբերյալ», – ասել է Պեսկովը։
Նրա խոսքով՝ Ռուսաստանը և Ուկրաինան բանակցությունների ընթացքում պետք է քննարկեն բարդ թեմաներ, այդ թվում՝ կարգավորման վերաբերյալ հուշագրերի նախագծերը։
«Բանակցությունների թեման բավականին բարդ է։ Այլ հարցերից բացի, իհարկե անհրաժեշտ կլինի քննարկել հուշագրերի այն նախագծերը, որոնք փոխանցել ենք միմյանց երկրորդ փուլի ժամանակ», – ասել է նա։
Պեսկովը նշել է, որ որևէ առիթ չկա Ուկրաինայի հետ բանակցությունների նոր փուլի ընթացքում հրաշք առաջընթաց ակնկալելու։
«Հազիվ թե դա հնարավոր լինի ներկայիս իրավիճակում», – ասել է նա՝ պատասխանելով այն հարցին, թե ինչ արդյունքներ է Կրեմլը ակնկալում բանակցությունների երրորդ փուլից։
Հիշեցնենք` Ռուսաստանն ու Ուկրաինան ուղիղ բանակցությունների երկու փուլ են անցկացրել, հանդիպումները կայացել են Ստամբուլում։ Դրանց արդյունքում տեղի է ունեցել գերիների փոխանակում, Մոսկվան նաև զոհված զինծառայողների մարմիններ է հանձնել Կիևի ռեժիմին։ Բացի այդ, կողմերը փոխանակվել են հակամարտության կարգավորման վերաբերյալ հուշագրերի նախագծերով։