ԵՐԵՎԱՆ, 19 հուլիսի – Sputnik. Սիրիայի անցումային նախագահ Ահմեդ ալ Շարաան հայտարարել է երկրում համապարփակ հրադադարի մասին: Ինչպես հաղորդում է SANA-ն, այս մասին ասվում է Սիրիայի նախագահի վարչակազմի հայտարարության մեջ:
«Երկրում ստեղծված հատուկ հանգամանքների լույսի ներքո, ցանկանալով վերջ դնել արյունահեղությանը, պահպանել Սիրիայի տարածքի միասնությունը և նրա բնակչության անվտանգությունը, Սիրիայի Արաբական Հանրապետության ղեկավարությունը հայտարարում է անհապաղ համապարփակ հրադադարի մասին», - ասվում է հայտարարության մեջ:
Սիրիայի ղեկավարությունը կոչ է արել բոլոր կողմերին առանց բացառության լիովին կատարել այս որոշումը, անհապաղ դադարեցնել բոլոր ռազմական գործողությունները բոլոր տարածքներում, պաշտպանել քաղաքացիական բնակչությանը և ապահովել մարդասիրական օգնության անխոչընդոտ մատակարարումը:
Իշխանությունները զգուշացրել են, որ հրադադարի խախտումը կհամարվի երկրի ինքնիշխանության խախտում և կհանգեցնի իրավական միջոցների:
Հիշեցնենք` հուլիսի 13-ին հայտնի դարձավ, որ զինված խմբավորումները հարձակվել են Սուվեյդա նահանգի մի շարք բնակավայրերի վրա, որտեղ հիմնականում դրուզներ են ապրում։ Խաղաղ բնակչությանը պաշտպանելու համար կռվի դուրս եկան դրուզների ինքնապաշտպանական ջոկատները (Իսրայելի կառավարության աջակցությամբ)։ Սիրիայի պաշտպանության նախարարության տվյալներով՝ բախումների ժամանակ ավելի քան 30 մարդ է սպանվել, ավելի քան 100-ը` վիրավորվել։
Դրուզներին աջակցելու նպատակով Իսրայելի պաշտպանության բանակը հուլիսի 16-ին հարված հասցրեց Դամասկոսում Սիրիայի գլխավոր շտաբի տարածքին: Սիրիայի հետ սրման ֆոնին Իսրայելի բանակը նաև հայտարարեց Գոլանի բարձունքներ երկու դիվիզիա տեղափոխելու պատրաստակամության մասին:
Հուլիսի 19-ին Թուրքիայում ԱՄՆ դեսպան և Սիրիայի հարցերով ԱՄՆ հատուկ բանագնաց Թոմ Բարաքը հայտարարեց, որ Իսրայելի վարչապետ Բենիամին Նեթանյահուն և Սիրիայի ժամանակավոր նախագահ Ահմեդ ալ Շարաան համաձայնության են եկել հրադադարի շուրջ։