ԵՐԵՎԱՆ, 17 հուլիսի – Sputnik. Վրաստանի տարածքով տարանցման ձգձգումների պատճառով տուժած հայկական կոնյակ արտահանողների համար կհետաձգվեն 2022–2023 թթ. խաղողի մթերման համար վերցրած վարկերի վճարումները: Համապատասխան որոշումն այսօր ընդունվեց ՀՀ կառավարության նիստի ժամանակ։
Խոսքը արտոնյալ վարկերի մասին է, որոնց համար պետությունը սուբսիդիաներ է տրամադրում, որպեսզի կոնյակի գործարաններն ու ֆերմերները կարողանան առանց ուշացման ապահովել հանձնված բերքի դիմաց համար վճարումները։ Հաշվի առնելով, որ վերջին շրջանում մի շարք ձեռնարկություններ վնասներ են կրել արտահանման խնդիրների պատճառով, նրանց համար ՀՀ կառավարությունը մինչև 6 ամսով կերկարաձգի վարկերի մարման արտոնյալ ժամկետը:
«Նախագծի ընդունման արդյունքում որոշակիորեն կմեղմվի ներգրավված վարկերի սպասարկման բեռը, տնտեսվարողները հնարավորություն կունենան ծրագրից օգտվելու նպատակով մինչև սեպտեմբերի 1–ը կնքել խաղողի մթերման պայմանագրեր և կատարել խաղողի լրացուցիչ ծավալներով մթերումներ»,– ասված է որոշման հիմնավորման մեջ։
Հիշեցնենք` կոնյակ արտադրողները մայիսի 13-ին բողոքի ակցիա էին կազմակերպել ՀՀ–ում Վրաստանի դեսպանատան դիմաց` դժգոհելով, որ վրացական կողմը խոչընդոտներ է ստեղծում Հայաստանից Ռուսաստան բեռնատարների անցման համար։ Հայ տնտեսվարողները պնդում էին, որ Վրաստանում լաբորատոր փորձաքննության են ենթարկում հայկական կոնյակը, իսկ բեռնատարները ստիպված են մի քանի շաբաթ կանգնել Վրաստանի սահմանային անցակետում։
ՀՀ էկոնոմիկայի նախարար Գևորգ Պապոյանը հարցը լուծելու համար մեկնել է Թբիլիսի, որտեղ հանդիպել է վրացի գործընկերների հետ, քննարկվել է ստուգման գործընթացն արագացնելու հարցը։
Հավելենք, որ հունիսի 1-ից 8–ը Հայաստանից Վրաստանի տարածքով Ռուսաստան է մեկնել հայկական կոնյակով բեռնված ավելի քան 210 բեռնատար։