ԵՐԵՎԱՆ, 16 հուլիսի - Sputnik. ԱՄՆ-ն մտահոգված է Սիրիայում էթնիկ խմբերի միջև բախումներով, որոնք հանգեցրել են Իսրայելի ռազմական միջամտությանը, և հույս ունի, որ իրավիճակը կկարգավորվի։ Այս մասին հայտարարել է պետքարտուղար Մարկո Ռուբիոն:
Ամերիկյան դիվանագիտության ղեկավարն ընդգծել է, որ Սպիտակ տանը «խիստ մտահոգված են» ստեղծված իրադրությամբ և կապի մեջ են բոլոր կողմերի հետ, որպեսզի հնարավորինս շուտ ավարտեն հակամարտությունը:
«Մենք ուզում ենք, որ մարտերն ավարտվեն։ Հուսով եմ, որ մենք որոշ նորություններ կստանանք այսօր ավելի ուշ»,- ասել է նա լրագրողներին։
Հիշեցնենք` հուլիսի 13-ին հայտնի դարձավ, որ զինված խմբավորումները հարձակվել են Սուվեյդա նահանգի մի շարք բնակավայրերի վրա, որտեղ դրուզներ են ապրում։ Խաղաղ բնակչությանը պաշտպանելու համար կռվի դուրս եկան դրուզների ինքնապաշտպանական ջոկատները։ Երկու կողմից էլ կան զոհեր, վիրավորներ և գերիներ։ Մարտերը շարունակվում են։
Իսրայելի պաշտպանության նախարար Կացը Դամասկոսին կոչ արեց զորքը դուրս բերել նահանգից և ազատ արձակել ձերբակալված դրուզներին: Այդ պահանջները չկատարելու դեպքում նա խոստացավ ուժեղացնել կառավարական թիրախների ուղղությամբ հարվածները։
Իսրայելի պաշտպանության բանակը (ՑԱԽԱԼ) հուլիսի 16-ին հայտարարեց, որ հարվածներ է հասցրել Դամասկոսում Սիրիայի գլխավոր շտաբի մուտքի դարպասներին։