ԵՐԵՎԱՆ, 5 հուլիսի – Sputnik. Թուրքիայի գլխավոր ընդդիմադիր Հանրապետական ժողովրդական կուսակցության (ԺՀԿ) առաջնորդ Օզգյուր Օզելը կոչ է արել գործող կառավարությանը նոյեմբերին անցկացնել արտահերթ նախագահական ընտրություններ։
Իրավապահ մարմինները այսօր առավոտյան ձերբակալել են Թուրքիայի երեք խոշոր քաղաքների՝ Ադանայի, Անթալիայի և Ադիյամանի քաղաքապետերին՝ կուսակցության ներկայացուցիչների կողմից ղեկավարվող վարչակազմերում կոռուպցիայի վերաբերյալ գործի շրջանակներում։ Թուրքիայի նախագահ Ռեջեփ Թայիփ Էրդողանը մեղադրել է թուրքական ընդդիմությանը «հանցագործությունները թաքցնելու և հանցագործներին արդարացնելու» փորձերի մեջ՝ ասելով, որ ընդդիմությունը փորձում է «խեղաթյուրել իրավիճակը» փողոցային բողոքի ակցիաներով։
«Եթե «Արդարություն և զարգացում» կուսակցությունը առաջին տեղերն է զբաղեցնում, եկեք արտահերթ ընտրություններ անցկացնենք նոյեմբերի 2-ին։ Եթե դուք առաջին կուսակցությունը լինեիք, կգնայիք ընտրությունների», - ասել է Օզելը իր ելույթում, հաղորդում է ՌԻԱ Նովոստին։
ԺՀԿ-ն մարտի վերջից կոչ է անում արտահերթ նախագահական ընտրություններ անցկացնել` չնայած թուրքական իշխանությունները բազմիցս հայտարարել են, որ այս հարցը օրակարգում չկա։ Հաջորդ նախագահական ընտրությունները նախատեսված են 2028 թվականի գարնանը։
Ընդդիմադիր կուսակցությունը կարող է Անկարայի քաղաքապետ Մանսուր Յավաշին առաջադրել որպես նախագահի թեկնածու, եթե Ստամբուլի քաղաքապետ Էքրեմ Իմամօղլուն, որը մարտին ձերբակալվել էր և կուսակցության կողմից ընտրվել որպես նախագահի թեկնածու, ազատ չարձակվի։