ԵՐԵՎԱՆ, 3 հուլիսի – Sputnik․ Գործարար, բարերար Սամվել Կարապետյանի որդին՝ Սարգիս Կարապետյանը, տեսանյութով շնորհակալություն է հայտնել հանրությանն աջակցության համար։
«Փոքրիկ խմբակն ուզում է տարածել իրենց վախը մեզ վրա՝ սահմանափակելով մեր ազատությունը, դատական գործընթացը դարձնելով ուղղակի աբսուրդ։ Ազատությունը պարզապես բառ չէ, այն մտածելակերպ է։ Իմ հայրը, գտնվելով բանտում, հազար անգամ ավելի ազատ է, քան իրենք բոլորը միասին»,– ասել է Սարգիս Կարապետյանը։
Նա շնորհակալություն է հայտնել բոլոր այն մարդկանց, ովքեր այս օրերին աջակցություն են հայտնել իրենց ընտանիքին։
«Դա ուժ է մեզ տալիս պայքարել մեր ընդհանուր ճշմարտության, մեր իրավունքների, մեր արժանապատվության համար»,- նշել է գործարարի որդին` աջակիցներին հրավիրելով վաղը մասնակցել ի պաշտպանություն Սամվել Կարապետյանի երթին։
Հիշեցնենք` Սամվել Կարապետյանի տանը հունիսի 17-ին խուզարկություն իրականացվեց այն բանից հետո, երբ նա հրապարակավ աջակցություն հայտնեց Հայ առաքելական եկեղեցուն՝ ընդգծելով, որ մի փոքրիկ խմբակ, մոռանալով հայոց պատմությունը, հայ եկեղեցու հազարավոր տարիների պատմությունը, հարձակվել է հայ եկեղեցու վրա, հայ ժողովրդի վրա:
Նրա հայտարարությունից հետո ՀՀ վարչապետ Նիկոլ Փաշինյանը գործարարին ուղղված վիրավորական և սպառնալի գրառումներ արեց սոցցանցերում։
Ավելի ուշ ՔԿ–ն հայտնեց, որ 422-րդ հոդվածի 2-րդ մասով նախաձեռնվել է քրեական վարույթ այն կապակցությամբ, որ Սամվել Կարապետյանը զանգվածային լրատվության միջոցով հարցազրույց տալու ընթացքում հնչեցրել է իշխանությունը զավթելուն՝ ՀՀ սահմանադրությամբ չնախատեսված եղանակով ՀՀ կառավարության լիազորություններին տիրանալուն ուղղված հրապարակային կոչ:
Հունիսի 18-ին Սամվել Կարապետյանը 2 ամսով կալանավորվեց։ Այժմ նա «Երևան–Կենտրոն» ՔԿՀ–ում է։