ԵՐԵՎԱՆ, 1 հուլիսի – Sputnik. Պրոֆեսոր Արմեն Չարչյանին «Զվարթնոցում» արդեն արդեն թույլ են տվել հատել սահմանը։ Այս մասին Sputnik Արմենիային հայտնեց նրա փաստաբան Էրիկ Ալեքսանյանը։
Նշենք, որ վաղ առավոտյան հայտնի դարձավ, որ «Զվարթնոց» օդանավակայանում ԱԱԾ սահմանապահը չի թողնում, որ Արմեն Չարչյանը սահմանը հատի՝ պատճառաբանելով, թե Չարչյանի ելքը փակ է։
«Արմեն Չարչյանը կարողացել է մեկնել Մադրիդ, որտեղ մասնակցելու է Հայ բժիշկների համաշխարհային կոնգրեսին»,–նշեց պաշտպանը։
Հավելենք, որ Արմեն Չարչյանը, հանդիսանալով ադմինիստրատիվ խորհրդի անդամ, այդ համագումարին պետք է հանդես գա ելույթով։ Ալեքսանյանն ավելի վաղ հայտնել էր,որ Չարչյանի տեղաշարժի սահմանափակումը վաղուց վերացված է, դատարանի որոշումը ազատ տեղաշարժի սահմանափակումը վերացնելու վերաբերյալ վաղուց ուղարկվել է ՀՀ ՆԳՆ ոստիկանության ՔՈԳՎ, և դեռևս հունիսի 23-ին ոստիկանությունից հավաստիացրել են, որ համակարգում առկա սահմանափակումը վերացված է։
Հիշեցնենք` 2021թ. հունիսի 18-ին համացանցում հայտնվեց մի ձայնագրություն, որում լսվում էր, թե ինչպես է Չարչյանը աշխատակիցներին հորդորում ԱԺ ընտրությանը մասնակցել` ակնարկելով չքվեարկել գործող իշխանությունների օգտին։ Նույն օրը Չարչյանը ձերբակալվեց։
Հունիսի 21-ին Կենտրոնական ընտրական հանձնաժողովը թույլ տվեց քրեական հետապնդում սկսել Չարչյանի նկատմամբ։ Չարչյանը կալանավորվեց, ապա 15 մլն գրավի դիմաց ազատ արձակվեց։ Օգոստոսի 23-ին Չարչյանը կրկին կալանավորվեց։
2021–ի դեկտեմբերի 10-ին Երևանի ընդհանուր իրավասության դատարանը հրատապ նիստի ժամանակ որոշեց ազատ արձակել Չարչյանին։ Դատավոր Վահե Միսակյանի որոշմամբ` խափանման միջոց ընտրվեց ստորագրությունը չհեռանալու մասին։
2024թ․ փետրվարի 5–ին դատարանն Արմեն Չարչյանին դատապարտեց 3 տարի 7 ամիս պայմանական ազատազրկման։ Դատավորը նվազագույն պատիժ կիրառեց` հաշվի առնելով, որ Չարչյանը 4 ամիս 15 օր գտնվել է անազատության մեջ։
2024թ․ նոյեմբերի 27-ին ՀՀ վերաքննիչ քրեական դատարանն Արմեն Չարչյանի գործով մեղադրող դատախազի բողոքը մերժեց։ Դատախազը պահանջում էր Չարչյանին դատապարտել 5 տարվա ազատազրկման։
Արմեն Չարչյանի քրեական գործը փակվեց 2025–ի հունիսի 10–ին, երբ Վճռաբեկ դատարանը մերժեց վարույթ ընդունել Չարչյանի համար 5 տարվա ազատազրկման պահանջով` ՀՀ գլխավոր դատախազի բողոքը։