ԵՐԵՎԱՆ, 30 հունիսի – Sputnik. Բագրատ սրբազանն ու Միքայել սրբազանը «Երևան–Կենտրոն» ՔԿՀ–ի նույն խցում են։ Այս մասին այսօր ասուլիսի ժամանակ հայտարարեց փաստաբան Արա Զոհրաբյանը։
«Հատուկ են արել, որպեսզի կարողանան նրանց խոսակցությունը լսեն, ձայնագրեն»,–ասաց պաշտպանը։
Նրա խոսքով ՝ Հայաստանի իշխանությունները ցանկանում են Աջապահյանի դեմ հարուցված քրեական գործը «կապել» Գալստանյանի գործի հետ, չնայած նրան, որ Շիրակի թեմի առաջնորդը որևէ կերպ առնչություն չի ունեցել Բագրան սրբազան Գալստանյանի քաղաքական գործունեության հետ:
Հիշեցնենք` ՀՀ վարչապետ Նիկոլ Փաշինյանը հունիսի 24-ին իր ֆեյսբուքյան էջում տարածեց իշխանական կայքի մի հրապարակում, ըստ որի` իբր ընդդիմադիրները պետական հեղաշրջում են նախաձեռնել։ Այդ «բացառիկ թղթերում» արծարծվում էր նաև Բագրատ սրբազանի անունը։
Հունիսի 25-ի լույս 26-ի գիշերը Բագրատ արքեպիսկոպոս Գալստանյանը 2 ամսով կալանավորվեց ու տեղափոխվեց ԱԱԾ շենքում գտնվող «Երևան-Կենտրոն» քրեակատարողական հիմնարկ։
Շիրակի թեմի առաջնորդ Միքայել արքեպիսկոպոս Աջապահյանի նկատմամբ էլ քրեական գործ է հարուցվել իշխանությունը զավթելուն, տարածքային ամբողջականությունը խախտելուն, ինքնիշխանությունից հրաժարվելուն կամ սահմանադրական կարգը բռնի տապալելուն ուղղված հրապարակային կոչերի հոդվածով։
Դատարանը հունիսի 28–ին որոշեց 2 ամսով կալանավորել Շիրակի թեմի առաջնորդին։
Նշենք, որ այս ՔԿՀ–ում է գտնվում նաև գործարար Սամվել Կարապետյանը։