ԵՐԵՎԱՆ, 19 հունիսի - Sputnik. ԱՄՆ նախագահ Դոնալդ Թրամփը 90 օրով՝ մինչև 2025 թվականի սեպտեմբերի 17-ը, երկարաձգել է երկրի տարածքում չինական TikTok սոցցանցի արգելափակման հետաձգումը: Այս մասին նա հայտնել է Truth Social-ի իր էջում՝ նշելով, որ ստորագրել է համապատասխան հրամանագիր։
Պաշտոնը ստանձնելուց անմիջապես հետո Թրամփը հարթակի արգելափակումն արդեն հետաձգել է։ Նա ասել է, որ ԱՄՆ-ն պետք է ստանա «TikTok-ի կեսը», սակայն չի հստակեցրել, թե ինչ նկատի ունի:
TikTok-ի շուրջ իրավիճակը զարգանում է ԱՄՆ 46-րդ նախագահ Ջո Բայդենի կողմից 2024 թվականին ստորագրված օրենքի ֆոնին։ Փաստաթուղթը պարտավորեցնում է չինական ByteDance ընկերությանը՝ վաճառել TikTok-ը կամ մինչև 2025 թվականի հունվարի 19-ը ԱՄՆ-ում դադարեցնել դրա աշխատանքը: Այժմ ամերիկյան վարչակազմը ծառայության բաժնետոմսերի 50 %-ի համար պոտենցիալ գնորդներ է փնտրում։
Ավելի վաղ Թրամփը հայտարարել էր, որ դրական է վերաբերվում TikTok-ին, քանի որ սոցցանցի երիտասարդ լսարանը կարևոր դեր է խաղացել 2024 թվականի նոյեմբերին կայացած նախագահական ընտրություններում իր հաղթանակի գործում: Վաշինգտոնում Չինաստանի դեսպանատան ներկայացուցիչ Լյու Պենգյուն Tiktok-ի վրա ճնշումն անվանել է «թալան»: