ԵՐԵՎԱՆ, 10 հունիսի – Sputnik. «Գրանդ Քենդի» ՍՊԸ-ն, կատարելով ՀՀ սննդամթերքի անվտանգության տեսչական մարմնի կարգադրագրի պահանջը, իրացման ցանցից հետ է հավաքել 45,5 կգ պաղպաղակ: Տեղեկությունը հայտնում է ՍԱՏՄ մամուլի ծառայությունը։
Ավելի վաղ հայտնել էինք, որ ՀՀ սննդամթերքի անվտանգության տեսչական մարմինը երեք հրապարակումով ներկայացրել է պաղպաղակի արտադրություններում սկսված վերահսկողության արդյունքները, համաձայն որոնց` լաբորատոր փորձաքննության հանձնված 12 արտադրամասերից 10-ի պաղպաղակների նմուշներում հայտնաբերվել են իրավական ակտերով սահմանված նորմերի անհամապատասխանություններ մանրէաբանական և կաթնայուղի զանգվածային մաս ցուցանիշներով:
«Տվյալ արտադրատեսակների համար տեսչական մարմնի կողմից տրվել են իրացումն արգելելու, շուկայից հետ կանչելու, ոչնչացնելու կամ օգտահանելու կարգադրագրեր»,–նշված է հաղորդագրության մեջ։
Իրացման ցանցում խախտումներ ունեցող պաղպաղակների խմբաքանակներ տեսնելու դեպքում,սննդամթերքի անվտանգության տեսչական մարմինը խնդրում է զանգահարել 118 թեժ գծի հեռախոսահամարին։
ՍԱՏՄ–ն ավելի վաղ տեղեկացրել էր, որ վերահսկողություն է սկսվել պաղպաղակ արտադրող ընկերություններում, լաբորատոր փորձաքննության են հանձնվել 12 արտադրամասերից վերցված պաղպաղակի նմուշներ («Թամարա», «Գրանդ Քենդի», «Թամարա և Անի», «Մարտին Սթար», «Արտսվիթ», «Նաիրի Լենդ», «Փինք Բերրի», «Մառնիկ», «Իգիթ», «Աշտարակ Միլկ» ՍՊԸ-ներ, անհատ ձեռնարկատերեր Ազատ Ղազանչյան, Էդուրադ Կարապետյան), որոնցից 10–ում խախտումներ են հայտնաբերվել։