ԵՐԵՎԱՆ, 9 հունիսի - Sputnik. Առաջիկայում Հայաստանում հասանելի կլինի վիրտուալ SIM քարտի միջոցով էլեկտրոնային ստորագրությունը։ Այս մասին 2024 թվականի պետական բյուջեի կատարման հաշվետվության քննարկման ժամանակ ասաց տեղեկատվական համակարգերի գործակալության տնօրեն Ներսես Երիցյանը։
Նա հիշեցրեց, որ ՀՀ վարչապետ Նիկոլ Փաշինյանը էլեկտրոնային պետական ծառայությունների զարգացմանը նվիրված խորհրդակցություններում բազմիցս հանձնարարել է ապահովել հանրային էլեկտրոնային նույնականացման հնարավորությունը, այդ թվում՝ հարկային հայտարարագրերի ստորագրման համար:
Ի պատասխան պատգամավոր Արսեն Թորոսյանի դիտարկմանը, թե սովորական SIM-ի միջոցով ստորագրությունն արդեն հասանելի է, իսկ վիրտուալ SIM-ի միջոցով՝ ոչ, Երիցյանը տեղեկացրեց, որ անհրաժեշտ տեխնիկական լուծումը նախապատրաստվել է դեռևս մարտին, մնում է միայն ավարտել դրա օրենսդրական ձևակերպումը։
«Հուսով ենք, որ ընթացիկ ամսում բոլոր անհրաժեշտ օրենսդրական ընթացակարգերը կավարտվեն, և մենք կկարողանանք քաղաքացիներին առաջարկել էլեկտրոնային ստորագրության նոր ձևաչափ», - նշեց նա:
Հիշեցնենք` Հայաստանի ավելի քան 700 հազար քաղաքացիներ, բոլորը՝ վարձու աշխատողներ, առաջին անգամ պարտավոր են եկամուտների և գույքի հայտարարագրեր ներկայացնել 2024թ– համար։ Վերջնաժամկետն ի սկզբանե սահմանված լինելով մայիսի 1-ը` երկարաձգվել է մինչև նոյեմբերի 1-ը: