ԵՐԵՎԱՆ, 7 հունիսի - Sputnik. Հայաստանի Հանրապետական կուսակցություն առաջիկա օրերի ընթացքում կներկայացնի վարչապետի իր թեկնածուին` ՀՀԿ փոխնախագահ Արմեն Աշոտյանին։ Այս մասին գրում է «Հրապարակ» թերթը։
Հունիսի 6–ին «Հանրապետական» կուսակցությունը դիմել էր ԱԺ ընդդիմադիր «Պատիվ ունեմ» խմբակցությանը` առաջարկելով նախապատրաստել ԱԺ որոշման նախագիծ ՀՀ վարչապետին անվստահություն հայտնելու գործընթացը մեկնարկելու համար։
Նշենք, որ ավելի վաղ Արթուր Վանեցյանի անունն էր շրջանառվում որպես ՀՀԿ-ի վարչապետի թեկնածու, սակայն կուսակցությունում մտափոխվել են՝ կանգ առնելով Աշոտյանի թեկնածության վրա։
Հիշեցնենք` ընդդիմադիր ակտիվիստ, քաղաքական գործիչ Էդգար Ղազարյանն ու «Վետօ» շարժման անդամ Նարեկ Մալյանը ապրիլի 28-ին 107 նամակներ ուղարկեցին ԱԺ 107 պատգամավորներին՝ առաջարկելով խելամիտ ժամկետում վարչապետի իմպիչմենտ նախաձեռնելու գործընթաց սկսել։
Մայիսի 2-ին «Հայաստան» խմբակցությունը հայտարարեց, որ պատրաստ է միանալ ՀՀ վարչապետ Նիկոլ Փաշինյանի նկատմամբ իմպիչմենտ նախաձեռնելու գործընթացին, եթե նման գործընթաց նախաձեռնողները կարողանան ապահովել պակասող 8 պատգամավորի ստորագրությունը։
«Պատիվ ունեմ» խմբակցությունը մայիսի 6-ին պատասխանեց առաջարկին` հայտարարելով, որ դեռ չունեն վարչապետի թեկնածու, և որ իրենց պատրաստակամությունն են հայտնում առանց որևէ նախապայմանի քննարկելու թեկնածուի հարցը։
Հավելենք, որ «Քաղաքացիական պայմանագրից» հեռացված Հովիկ Աղազարյանն ու Հակոբ Ասլանյանը վարչապետի թեկնածու են առաջադրում «Լուսավոր Հայաստան» կուսակցության նախագահ Էդմոն Մարուքյանին: