ԵՐԵՎԱՆ, 27 մայիսի – Sputnik. Ադրրբեջանի նախագահ Իլհամ Ալիևն ընդամենը հայելային պատասխաններ է տալիս հայկական կողմից հնչող հայտարարություններին ու քայլերին։ Այս մասին այսօր ԱԺ–ում լրագրողների հետ զրույցում հայտարարեց ԱԺ նախագահ Ալեն Սիմոնյանը` անդրադառնալով Ալիևի` Հայաստանը որպես Արևմտյան Ադրբեջան դիտարկելու հռետորաբանությանը։
Այս համատեքստում ՀՀ ԱԺ նախագահը կոչ արեց բոլորին ապրել իրականության մեջ ու Հայաստանը չընկալել որպես աշխարհից կտրված մի մաս։
«Թարգեք ձեր աշխարհում ապրել, որ կա միայն Հայաստանն իր պատմության գրքով, իսկ մնացած բոլորը ոչ կարևոր ժողովուրդներ են, քանի որ երբ մենք` հայերս, դուդուկ ունեինք ու ծիրան էինք աճեցնում, նրանք ծառերի վրա էին։ Թարգե՛ք այդ մոտեցումը, մի՛ ոչնչացրեք Հայաստանի Հանրապետությունն ու նրա ապագան, սխալ բան եք անում։ Հասկացեք, որ կարողանանք հաղթել մեր պոտենցիալ հակառակորդին։ Մենք բոլոր հայերով սուրբ ենք, սրբադասվել ենք, բայց երբ մենք մեր սուրբ, Աստծո, Մաշտոցի կողմից գրված, Արարատ սարը տենց հետևից գցած մեզ վրա, Նոյի ժողովուրդս, 1700 տարի առաջ քրիստոնեությունն ընդունած ժողովուրդս նման բան ենք ասում, Ալիևն էլ ասում է` ես ձեզ էսպես կպատասխանեմ»,– փորձեց իր մտքերը հիմնավորել Սիմոնյանը։
Նա վստահ է, որ Արցախի հայերը պետք է ինչ–որ մի օր, երբ անվտանգ լինի, վերադառնան, ապրեն իրենց տներում, մեր եկեղեցիներն էլ լավ կլինի, որ մի օր վերաբացվեն։
«Սակայն մենք քաղաքականությամբ ենք զբաղվում ու հո չե՞նք եկել բիսետկում նստենք ու միասին բամբասենք։ Երբ կլինի խաղաղության պայմանագիր, հայերը կարող են ապրել Բաքվում։ Մնացածը կարող են վերադառնալ այն գյուղերը, որ ժամանակին ապրել են Հայաստանի տարածքում։ Հիմա հայերը ո՞նց են ապրում Վրաստանում. նույն տրամաբանության մեջ»,– կարծում է ԱԺ նախագահը։
Նա համոզված է, որ խաղաղության պայմանագրի ստորագրումից 5 րոպե անց Հայաստանի ու Ադրբեջանի քաղաքացիները սկսելու են իրար հետ առևտուր անել, իրար հետ բոլոր հնարավոր ձևերով կոմունիկացիա ապահովել։