ԵՐԵՎԱՆ, 24 մայիսի – Sputnik. ԱՄՆ նախագահ Դոնալդ Թրամփի վարչակազմը փորձում է հասնել նրան, որ ԵՄ-ն միջոցներ ձեռնարկի ՉԺՀ-ի դեմ, սակայն այս փուլում դա նրան չի հաջողվում։ Տեղեկությունը հայտնում է Wall Street Journal թերթը՝ վկայակոչելով անանուն աղբյուրներին:
Ինչպես նշվում է հրապարակման մեջ, Թրամփի խորհրդականները մասնավոր զրույցներում եվրոպացի պաշտոնյաներին դժգոհություն են հայտնել, որ բանակցությունները դանդաղել են դաշինքի անդամների տարբեր առևտրային առաջնահերթությունների պատճառով։
«ԱՄՆ-ն դեռևս հաստատում չի ստացել այն մասին, որ ԵՄ առաջնորդները մտադիր են նոր մաքսատուրքեր սահմանել չինական արտադրական ապրանքների վրա, ինչը Թրամփի վարչակազմի պաշտոնյաների համար առաջնահերթություն է, քաբի որ նրանք ձգտում են ուժեղացնել առևտրային ճնշումը Պեկինի վրա», - պարբերականին հայտնել են աղբյուրները:
ԱՄՆ ֆինանսների նախարար Սքոթ Բեսենտը ԵՄ-ի հետ մաքսատուրքերի կարգավորման շուրջ անարդյունք բանակցությունների ֆոնին հայտարարել է, որ Բրյուսելը կոլեկտիվ գործողությունների խնդիր ունի, երբ միության անդամ շատ երկրներ նույնիսկ չգիտեն, թե ինչի մասին են պայմանավորվում իրենց ներկայացուցիչները:
Հիշեցնենք`մայիսի 23-ին ԱՄՆ նախագահ Դոնալդ Թրամփը հայտարարել էր, որ ԵՄ-ի հետ դժվար է բիզնես վարել, առևտրի շուրջ բանակցությունները «ոչ մի տեղ չեն տանում», ուստի նա առաջարկում է հունիսի 1-ից 50 տոկոս մաքսատուրքեր սահմանել դաշինքի նկատմամբ: