ԵՐԵՎԱՆ, 21 մայիսի - Sputnik. Մոլդովայի Գագաուզյան Ինքնավարության ղեկավար Եվգենյա Գուցուլին տնային կալանքի տակ են թողել մինչև հունիսի 13-ը։ Այս մասին հայտնում է Sputnik Մոլդովան։
Նշվում է, որ Քիշնևի Վերաքննիչ պալատը մերժել է քաղաքական գործչի փաստաբանների միջնորդությունը։
Գուցուլին մեղադրում են 2023 թվականի ընտրարշավի իբր անօրինական ֆինանսավորման հետ կապված հոդվածներով։
Ավելի վաղ հաղորդվել էր, որ Գուցուլը հայտարարել է` Գագաուզիայի ժողովուրդը թույլ չի տա իրեն պաշտոնանկ անել:
Հիշեցնենք` Գուցուլը ձերբակալվեց մարտի 25-ին Քիշնևի օդանավակայանում, այնուհետև 20 օրով կալանավորվեց: Դատախազությունը Գագաուզիայի ղեկավարին մեղադրում է հանրապետությունում հակասահմանադրական ճանաչված «Շոր» կուսակցությանը ֆինանսավորելու մեջ: Ի սկզբանե դատարանը որոշել էր, որ Գուցուլը պետք է կալանքի տակ գտնվի մինչև ապրիլի 14-ը, սակայն ապրիլի 9-ին խափանման միջոցը փոխվեց 30-օրյա տնային կալանքով։