ԵՐԵՎԱՆ, 13 մայիսի - Sputnik. ԱՄՆ–ի հետ վերջերս կայացած առևտրային բանակցություններից հետո Չինաստանը չեղարկել է Boeing ինքնաթիռների մատակարարման նկատմամբ սահմանված երկարատև արգելքը։ Այս մասին հաղորդում է Bloomberg-ը՝ հղում անելով համաձայնագրի մանրամասներին ծանոթ աղբյուրներին։
Գործակալության տվյալներով՝ սահմանափակումների վերացումը հնարավոր է դարձել փոխադարձ տուրքերի ժամանակավոր կրճատման վերաբերյալ համաձայնությունների ձեռքբերումից հետո։ Չինական ավիաընկերություններն այժմ կարող են ինքնուրույն որոշել պատվիրված ինքնաթիռներ ստանալու պայմաններն ու ժամկետները։
Նախորդ հանգստյան օրերին Չինաստանում տեղի ունեցան բարձր մակարդակով մաքսային բանակցություններ։ Չինաստանի Պետական խորհրդի փոխվարչապետ Հե Լիֆենը հայտարարել է երկխոսության հարցում զգալի առաջընթացի մասին։ ԱՄՆ առևտրային ներկայացուցիչ Ջեյմիսոն Գրիրը նշել է, որ90-օրյա անցումային ժամանակահատվածում Միացյալ Նահանգները կնվազեցնի մաքսատուրքերը մինչև 10%, Չինաստանը՝ մինչև 15%, հետագա մինչև 10% կրճատմամբ և մի շարք հակամիջոցների չեղարկմամբ։
Ինչպես հիշեցնում է Bloomberg-ը, Boeing-ը հայտնվել է առևտրային վեճի կիզակետում այն բանից հետո, երբ ԱՄՆ-ն սահմանեց նոր ներմուծման սակագներ, որոնց Պեկինը հայելային պատասխան տվեց։ Չինական կարգավորող մարմինները փաստացի արգելափակեցին ամերիկյան կորպորացիայի ինքնաթիռների մատակարարումները, ինչը հանգեցրեց չինական շուկայից Boeing-ի դուրսմղմանը։
Միևնույն ժամանակ, Չինաստանը շարունակում է մնալ ինքնաթիռների հիմնական սպառողը. առաջիկա 20 տարիների ընթացքում նրա մասնաբաժինը համաշխարհային պահանջարկում, Bloomberg-ի գնահատականներով, կկազմի մոտ 20%: Չնայած Boeing-ը վերջին տարիներին խոշոր պայմանագրեր չի կնքել չինական ավիափոխադրողների հետ, դեռ 2018 թվականին այդ երկրին բաժին էր ընկնում ընկերության ընդհանուր վաճառքի գրեթե 25%-ը։
Boeing-ը քաղաքացիական և ռազմական ավիացիոն տեխնիկայի լայն տեսականի է արտադրում, ինչպես նաև մասնակցում տիեզերական ծրագրերի։ Կորպորացիայի կառուցվածքը ներառում է երկու հիմնական ստորաբաժանում՝ «Boeing Commercial Airplanes»-ը, որը պատասխանատու է քաղաքացիական ինքնաթիռների համար, և «Integrated Defense Systems»-ը, որը ռազմական և տիեզերական նախագծեր է իրականացնում։