Ուկրաինայի զինված ուժերը հրթիռային հարված են հասցրել Կուրսկի շրջանում՝ Ռիլսկի ուղղությամբ։ Տուժել է երեք մարդ։ Այս մասին հայտնել է շրջանի մարզպետի պաշտոնակատար Ալեքսանդր Խինշտեյնը։ Նրա խոսքով՝ երկու տղամարդ ունեն գլխի, ձեռքերի բեկորային լուրջ վնասվածքներ, կոտրվածքներ. նրանք ծանր վիճակում են: Եվս մեկ կին ստացել է նախաբազկի և ազդրի բեկորային վնասվածքներ. նրա կյանքին վտանգ չի սպառնում: Վիրավորները տեղափոխվել են Ռիլսկի հիվանդանոց, մոտ ժամանակներս նրանց կտեղափոխեն Կուրսկի շրջանային հիվանդանոց:
Խինշտեյնը հայտնել է նաև, որ հարվածի հետևանքով լրջորեն վնասվել է քաղաքի մուտքի մոտ գտնվող հյուրանոցը:
«Պայթյունի ալիքից վնասվել են նաև երկու մեքենաներ և երկու առանձնատներ՝ կոտրվել են պատուհանները, վնասվել է տանիքը, ավտոտնակը»,-հայտնել է Խինշտեյնը Telegram-ի իր ալիքում։
Այս գիշեր ուկրաինական անօդաչուների հարձակումը հետ է մղվել նաև Կամենսկում (Ռոստովի մարզ), նախնական տվյալներով տուժածներ և ավերածություններ չկան, իր տելեգրամյան ալիքում գրել է շրջանի մարզպետի ժամանակավոր պաշտոնակատար Յուրի Սլյուսարը:
Հիշեցնենք՝ 2022–ի փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։
Ուկրաինական զորքը տարբեր եղանակներով (այդ թվում` ԱԹՍ–ներով) պարբերաբար գնդակոծում և գրոհում է ՌԴ սահմանամերձ շրջանները, մասնավորապես` Բելգորոդի, Բրյանսկի, Կուրսկի և Վորոնեժի մարզերը։