ԵՐԵՎԱՆ, 29 ապրիլի - Sputnik. Ռուսաստանի «Ն.Ե. Ժուկովսկու անվան ինստիտուտ» ազգային հետազոտական կենտրոնը աշխարհում առաջին անգամ փորձարկել է գերձայնային քաղաքացիական ինքնաթիռների համար նախատեսված ինտելեկտուալ տեխնոլոգիաները։ Ինչպես տեղեկացնում է ՌԻԱ Նովոստին, այս մասին հայտնել են կենտրոնի մամուլի ծառայությունից։
«Ինստիտուտը փորձարկեց խելացի տեխնոլոգիաների ցուցադրիչը, որն իրականացնում է «տերմինալից տերմինալ» հայեցակարգը «փակ խցիկի» պայմաններում՝ առանց ապակեպատման: Այս տեխնոլոգիաներն ապագայում կարող են օգտագործվել գերձայնային քաղաքացիական ինքնաթիռների նոր սերունդ ստեղծելու համար», – ասվում է հաղորդագրության մեջ:
Փորձարկումներին մասնակցել են «Ն. Ե. Ժուկովսկու անվան ինստիտուտ» ԱՀԿ–ի կազմի մեջ մտնող Ավիացիոն համակարգերի պետական գիտահետազոտական ինստիտուտի և Ս.Ա. Չապլիգինի անվան Սիբիրյան ավիացիայի գիտահետազոտական ինստիտուտի մասնագետները։
«Տերմինալից տերմինալ» հայեցակարգը ենթադրում է ինքնաթիռի կառավարում տարբեր սպեկտրալ միջակայքերի տեսախցիկների վրա հիմնված արտաքին տեսողության համակարգերի միջոցով, որոնք ամբողջությամբ բացառում են օդաչուների խցիկի ավանդական ապակեպատումը։ Փորձարկումների ժամանակ ինքնաթիռի կառավարումն իրականացվել է հեռավար եղանակով արտաքին դիտարկման համակարգերի օգնությամբ։
«Այս տեխնոլոգիաների վրա աշխատանքը չափազանց կարևոր է ապագա գերձայնային քաղաքացիական ինքնաթիռների տեսքը ձևավորելու համար։ Հաջող փորձարկումները հաստատեցին ինքնաթիռի թռիչքի, վայրէջքի և կառավարման սկզբունքային հնարավորությունը առանց ապակեպատման», – նշել է ՌԴ առաջին փոխվարչապետ Դենիս Մանտուրովը։
«Ն. Ե. Ժուկովսկու անվան ինստիտուտից» պարզաբանել են, որ ցուցադրիչը ներառում է արտաքին տեսողության համակարգ, նորարարական նավիգացիոն և դիտարկման սարքեր։ Կառավարման համակարգը հիմնված է հինգ տեսանելի սպեկտրի և երկու ինֆրակարմիր տեսախցիկների վրա, որոնք ապահովում են թռիչքի լիարժեք տեսողական ուղեկցումը։
Փորձնական թռիչքներն իրականացրել է ընդլայնված թռիչքային անձնակազմը, որում ընդգրկված են եղել ինքնաթիռի հրամանատարը, երկրորդ օդաչուն, բորտմեխանիկը, փորձարկող օպերատորը և փորձարկող օդաչուն։ Փորձարկող օդաչուի աթոռին նստել է Ս.Ա. Չապլիգինի անվան ՍիբԱԳԻ-ի գլխավոր տնօրեն, առաջին դասի փորձարկող օդաչու Վ.Ե. Բարսուկը։