Երևանի Հանրապետության հրապարակից մեկնարկեց ավանդական դարձած ջահերով երթը, որն այս տարի կրում «Մի՛ ուրացիր» կարգախոսը։ Այն կազմակերպում է ՀՅԴ Հայաստանի երիտասարդական միությունը՝ 1999 թվականից ի վեր։
«Թուրքիան պետք է ճանաչի Հայոց ցեղասպանությունը որպես պատմական փաստ, որպես մարդկության դեմ հանցագործություն ու որպես նախադեպ, որ չի կրկնվի այն։ Քանի դեռ հերքում ես ցեղասպանությունը, մեղսակից ես դրան»,- երթից առաջ հայտարարեց ՀՅԴ ԳՄ անդամ, «Հայաստան» խմբակցության անդամ Գեղամ Մանուկյանը։
Նրա խոսքով՝ այսօր, երբ պետությունը պետք է ամենաողջամիտ ձայնը լինի Հայոց ցեղասպանության ճանաչման հարցում, մենք տեսնում ենք անպատասխանատու զիջումներ և ուրացում։ Իսկ այս երթը կրկին արդարության անդրդվելի պահանջ է։
Ելույթներից հետո ջահակիրներն այրեցին Թուրքիայի և Ադրբեջանի դրոշները, որից հետո մեկնարկեց երթը դեպի Ծիծեռնակաբերդի Հայոց ցեղասպանության զոհերի հուշահամալիր։