ԵՐԵՎԱՆ, 9 ապրիլի – Sputnik. Մոսկվայում մահացու վթարի համար դատապարտված դերասան Միխայիլ Եֆրեմովը պայմանական վաղաժամկետ ազատվել է Բելգորոդի մարզի թիվ 4 ուղղիչ գաղութից և մեկնել գրանցման վայր: Տեղեկությունը լրագրողներին հայտնել է նրա փաստաբան Յուրի Պադալկոն։
Մարտի 24-ին Բելգորոդի մարզի Ալեքսեևսկի շրջանային դատարանը բավարարել էր Եֆրեմովի փաստաբանի` պայմանական վաղաժամկետ ազատման միջնորդությունը: Դատարանի որոշումն ուժի մեջ է մտել ապրիլի 9-ին: Եֆրեմովը գաղութում պատիժը կրում էր 2020 թվականի հոկտեմբերի 18-ից և բանտում է անցկացրել իրեն նշանակված ժամկետից մոտ 4,5 տարին։
Փաստաբանը հայտնել է, որ իր պաշտպանյալն արդեն մեկնել է Մոսկվա։ Պադալկոն նշել է նաև, որ Եֆրեմովը նախ կզբաղվի բուժմամբ, ապա կվերադառնա դերասանական կարիերային:
«Հիմա նա բուժվելու է, բնականաբար, այնուհետև նա կվերադառնա իր կարիերային, քանի որ նա շատ տաղանդավոր արտիստ է։ Նա սիրում է իր մասնագիտությունը, շատ է կարոտել։ Նույնիսկ այստեղ կարճ ֆիլմեր էր նկարում, որքան հնարավոր էր»,-լրագրողներին ասել է փաստաբանը։
Դատարանի որոշման համաձայն՝ Եֆրեմովը պետք է ամիսը մեկ ներկայանա վերահսկող մարմին և չփոխի մշտական բնակության վայրը։ Հասարակական կարգը խախտելու կամ պարտականությունների կատարումից խուսափելու դեպքում նրա պայմանական վաղաժամկետ ազատումը կարող է չեղարկվել:
Հիշեցնենք` 2020 թվականի հունիսի 8-ին ալկոհոլի ազդեցության տակ գտնվող Եֆրեմովը Մոսկվայի կենտրոնում «Jeep Grand Cherokee»-իով հատել էր կրկնակի հոծ գիծը և բախվել «Լադա» մակնիշի ավտոմեքենային, որի վարորդը՝ առաքիչ Սերգեյ Զախարովը, մահացել էր հիվանդանոցում։ Եֆրեմովը դատապարտվել էր 7,5 տարվա ազատազրկման, պատիժը կրում էր Բելգորոդի գաղութում։