ԵՐԵՎԱՆ, 1 ապրիլի – Sputnik. Պակիստանի նախկին վարչապետ և ընդդիմադիր «Հանուն արդարության» շարժման հիմնադիր Իմրան Խանը «Pakistan World Alliance» (PWA) իրավապաշտպան կազմակերպության կողմից առաջադրվել է Խաղաղության Նոբելյան մրցանակի:
Ինչպես հաղորդում է «The Times of India»-ն, PWA-ն Խանին առաջադրել է Պակիստանում մարդու իրավունքների և ժողովրդավարական արժեքների պաշտպանության գործում ունեցած ներդրման համար:
Նշենք, որ քաղաքական գործչին արդեն երկրորդ անգամ են առաջադրում այս մրցանակին։
2019 թվականին Իմրան Խանի թեկնածությունը ներկայացվել էր Հնդկաստանի հետ հակամարտությունը թուլացնելու ջանքերի համար։ Այն ժամանակ Պակիստանի խորհրդարանը պաշտպանել էր նախաձեռնությունը, սակայն Խանը հայտարարել էր, որ ինքն արժանի չէ դրան, մրցանակը պետք է ստանա նա, ով վերջնականապես կլուծի Քաշմիրի հարցը և տարածաշրջանում կայուն խաղաղություն կապահովի:
Իմրան Խանը Պակիստանի կառավարությունը գլխավորել է 2018-2022 թվականներին։ Նա պաշտոնը լքեց 2022 թվականի ապրիլին, երբ խորհրդարանը նրան անվստահություն հայտնեց։ 2023 թվականին նա կոռուպցիայի և լիազորությունների չարաշահման մեղադրանքով դատապարտվեց 14 տարվա ազատազրկման։