ԵՐԵՎԱՆ, 27 մարտի - Sputnik. Եգիպտական Հուրգադայի ափերի մոտ խորտակվել է ստորջրյա զբոսանավ, որի մեջ ՌԴ–ից զբոսաշրջիկներ են եղել։ Հաղորդվում է 6 զոհի, 9 տուժածի մասին, կան նաև անհետ կորածներ:
Ինչպես հայտնել է Հուրգադայում ՌԴ գլխավոր հյուպատոսությունը, բացի անձնակազմի անդամներից, նավում եղել է 45 զբոսաշրջիկ, այդ թվում՝ անչափահասներ: Նրանք բոլորը Ռուսաստանի քաղաքացիներ են, «Բիբլիո Գլոբուս» ընկերության զբոսաշրջիկներ։
Նշվում է, որ ստորջրյա զբոսանավն իրականացնում էր կանոնավոր ստորջրյա էքսկուրսիա, որի ընթացքում զբոսաշրջիկները դիտում էին կորալային խութը:
«Նախնական տվյալներով՝ նավում գտնվողների մեծ մասը փրկվել և տեղափոխվել է Հուրգադայի հյուրանոցներ ու հիվանդանոցներ։ Նրանց առողջական վիճակը մտահոգիչ չէ։ Զոհվել է 4 մարդ։ Մի քանի զբոսաշրջիկների ճակատագիրը պարզվում է», - ասվում է գլխավոր հյուպատոսության հայտարարության մեջ։
Տեղական ԶԼՄ-ների տվյալներով՝ տուժածներից 4-ը գտնվում են ծայրահեղ ծանր վիճակում։ Աղետի պատճառները դեռ հայտնի չեն: