ԵՐԵՎԱՆ, 27 մարտի – Sputnik. Հայաստանը նախատեսում է առևտրային տաղավարներ բացել Ղազախստանի շրջաններում, Աստանայում հայտարարել է ՀՀ արտգործնախարար Արարատ Միրզոյանը, հայտնում է Sputnik Ղազախստանը։
Բացի այդ, Հայաստանը հետաքրքրված է «Խորգոսում» խանութների ցանց բացելու հարցում։
Միրզոյանը նշել է, որ երկկողմ ապրանքաշրջանառության ներուժը զգալիորեն գերազանցում է նախկին ցուցանիշները։
«Համոզված եմ, որ համատեղ ջանքերով մեզ կհաջողվի էլ ավելի զարգացնել և ամրապնդել մեր երկկողմ հարաբերությունները, որոնք ռազմավարական ուղղվածություն ունեն: Մեր փոխայցերը և ակտիվ շփումները ամուր հիմք են դնում մեր գործընկերության համար», - նշել է նա ղազախ գործընկեր Մուրատ Նուրտլեուի հետ ընդլայնված հանդիպման ժամանակ:
ՀՀ արտգործնախարարի խոսքով` կողմերը պայմանավորվել են կրկնապատկել ջանքերը՝ 2024-2025 թվականների համար երկրների կառավարությունների միջև առևտրատնտեսական համագործակցության ճանապարհային քարտեզի իրականացման ուղղությամբ։
Ընդլայնված հանդիպման ժամանակ
© Sputnik / Санат Имангалиев
2025 թվականին «Թումո» հայկական կրթական կենտրոնի մասնաճյուղ կբացվի Ղազախստանում արհեստական բանականության ազգային կենտրոնի հիման վրա։
Ղազախստանն իր հերթին պատրաստ է ապագայում հայաստանցի ուսանողների համար բակալավրիատի և մագիստրատուրայի գծով կրթաթոշակներ հատկացնել։
Հանդիպմանը հիշեցվել է նաև, որ ապրիլին Հայաստանում Ղազախստանի օրեր կանցկացվեն։ Ղազախստանում հայկական մշակույթի օրերը տեղի են ունեցել 2024 թվականի հոկտեմբերին։
Հիշեցնենք՝ Հայաստանի արտաքին քաղաքական գերատեսչության ղեկավարը Ղազախստան է ժամանել այսօր առավոտյան։