Սա նոնսենս է, պոպուլիստական քայլ է և որևէ ապագա չունի. Sputnik Արմենիայի եթերում ասել է քաղաքագետ Արման Բոշյանը` խոսելով ԱԺ–ում երեկ երկրորդ ընթերցմամբ և ամբողջությամբ ընդունված ԵՄ–ին անդամակցելու գործընթացի մեկնարկն ազդարարող օրինագծի գործառնական և քաղաքական նպատակների մասին։
Նախագծում գրված է. «ՀՀ–ն այսպիսով «արտահայտում է հայ ժողովրդի կամքը` խնդիր դնելով Հայաստանը դարձնել անվտանգ, ապահով, զարգացած ու բարեկեցիկ երկիր»։
Օրենքի հեղինակները համոզված են, որ այն կնպաստի տարածաշրջանում խաղաղության և կայունության հաստատմանը, մարդու իրավունքների շարունակական զարգացմանն ու պաշտպանությանը, տնտեսական անվտանգության մեխանիզմների ստեղծմանը, ժողովրդագրական անվտանգության խնդրի լուծմանը, նոր աշխատատեղերի ստեղծմանը, կենսամակարդակի բարձրացմանը և այլն։
Ընդդիմադիր «Հայաստան» խմբակցությունը նախագծի քվեարկությանը չի մասնակցել` այն որակելով որպես «օրենքի ծաղր»։