ԵՐԵՎԱՆ, 25 մարտի – Sputnik. ՀՀ իշխանություններն ավելի խիստ են ստուգելու հաշմանդամության մասին կեղծ տեղեկանքներ դուրս գրող բժիշկներին։
«Քաղաքացիների ֆունկցիոնալության գնահատման մասին» օրենքում համապատասխան փոփոխությունների նախագիծը խորհրդարանում ներկայացրել է ՀՀ կառավարությանն առընթեր տեսչական մարմինների աշխատանքների համակարգման գրասենյակի ղեկավար Պետրոս Մարտիրոսյանը:
Ըստ օրինագծի՝ եթե մոտ մեկ տարվա ընթացքում հաշմանդամության հանձնաժողովում ընդգրկված որևէ բժշկի տված երեք սխալ եզրակացություն հայտնաբերվի, ապա Առողջապահության և աշխատանքի տեսչական մարմինը այդ մասին կտեղեկացնի առողջապահության նախարարությանը: Այնտեղ կորոշեն՝ այդ սխալները բժշկից կախված են եղել, թե ոչ (օրինակ ՝ փաստաթղթերում վրիպումներ են եղել)։ Դրա հիման վրա առողջապահության նախարարությունը կորոշի՝ հետ կանչե՞լ բժշկի արտոնագիրը, թե՞ ոչ։
Բացի այդ, տեսչությունը աշխատանքի և սոցիալական հարցերի նախարարություն կներկայացնի սոցիալական աշխատողների սխալ եզրակացությունները, որոնք հանգեցնում են նպաստների ոչ նպատակային նշանակման։
Նշենք, որ ավելի վաղ ՀՀ վարչապետ Նիկոլ Փաշինյանը հայտարարել էր սոցիալական նպաստների ոչ նպատակային նշանակումը բացառելու անհրաժեշտության մասին: Մի քանի տարի առաջ նպաստ էր ստանում մոտ 120 հազար ընտանիք, սակայն վերջին տարիներին նրանց թիվը գրեթե կրկնակի կրճատվել է։