ԵՐԵՎԱՆ, 25 մարտի – Sputnik. Ուկրաինա խաղաղապահ առաքելություն ուղարկելու ցանկություն ունեցող արևմտյան երկրները երազողներ են, որոնք ապացուցում են իրենց քաղաքական անկարողությունը։ Այս մասին հայտարարել է ՌԴ արտգործնախարար Սերգեյ Լավրովը։
«Այդ երազողներն իհարկե ամեն օր ապացուցում են իրենց լիակատար քաղաքական անկարողությունը», – ասել է նա Առաջին ալիքին տված հարցազրույցում։
Նրա խոսքով՝ եվրոպական երկրներն ուղղակիորեն հակասում են ԱՄՆ նախագահ Դոնալդ Թրամփի վարչակազմի դիրքորոշմանը, որը խոսում է Ուկրաինայի հակամարտության կարգավորման նախնական պարամետրերի մասին։
«Դրանք ուղղակիորեն հակասում են Թրամփի վարչակազմին, որը նախագահի, պետքարտուղար Մարկո Ռուբիոյի և ազգային անվտանգության հարցերով խորհրդական Մայք Ուոլցի շուրթերով հստակ ասել է, որ այժմ նախնական բանակցություններ են ընթանում վերջնական կարգավորման պարամետրերի շուրջ»,– ասել է Լավրովը։
ՌԴ նախարարը հավելել է, որ Եվրոպան բազմաթիվ խնդիրներ ունի սոցիալական ոլորտում և տնտեսության մեջ, այդ թվում այն պատճառով, որ ԱՄՆ նախկին նախագահ Ջո Բայդենի վարչակազմը «բաց է թողել» և ուղարկել Ռուսաստանի հետ կռվելու։
ՌԴ ԱԳՆ ղեկավարն ընդգծել է, որ Ռուսաստանին ուկրաինական հակամարտության կարգավորման համար անհրաժեշտ են հստակ և ստուգվող երաշխիքներ ու մեխանիզմներ։
«Հաշվի առնելով բոլոր մտափոխությունները, նկատի ունենալով, որ ամեն անգամ, երբ հանկարծակի հրադադար է հայտարարվում, և Ուկրաինան համաձայնում է բացառապես այն պատճառով, որ կոնկրետ պատմական պահին, որի մասին խոսվում է, Ուկրաինան մարտի դաշտում անելանելի իրավիճակում է հայտնվել, իսկ հենց դադար է լինում, անմիջապես, շաբաթների կամ մի քանի ամսվա ընթացքում, այդ հրադադարը խախտվում է։ Այդպես է եղել Մինսկի պայմանավորվածությունների գործողության ողջ ընթացքում, մեզ այժմ անհրաժեշտ են հստակ, ամենակոնկրետ, ստուգվող և աշխատող երաշխիքներ ու մեխանիզմներ», – ասել է Սերգեյ Լավրովը։
Հիշեցնենք, որ Ռուսաստանի և ԱՄՆ-ի ներկայացուցիչների բանակցությունները տեղի են ունեցել մարտի 24-ին Էր Ռիադում։ Նշվում է, որ դրանք տևել են ավելի քան 12 ժամ։
Ինչպես հայտարարել են Կրեմլում, հանդիպումը հիմնականում նվիրված է եղել սևծովյան նախաձեռնության թեմային, որը քննարկվել է Վլադիմիր Պուտինի և Դոնալդ Թրամփի վերջին հեռախոսազրույցի ժամանակ։