ԵՐԵՎԱՆ, 21 մարտի – Sputnik. Թուրքիայի իշխանությունները ձերբակալել են 54 մարդու, որոնք կասկածվում են Ստամբուլի քաղաքապետ Էքրեմ Իմամօղլուի ձերբակալությունից հետո սոցիալական ցանցերում սադրիչ հրապարակումներ տարածելու մեջ: Այս մասին հայտնել է ներքին գործերի նախարար Ալի Երլիկայան՝ նշելով, որ մյուս կասկածյալներին հայտնաբերելու ուղղությամբ օպերատիվ միջոցառումները շարունակվում են:
Քաղաքապետի ձերբակալության ֆոնին մարտի 19-ին և 20-ին Ստամբուլում և Անկարայում բողոքի ցույցեր են տեղի ունեցել: Ընդդիմադիր Ժողովրդահանրապետական կուսակցության (ԺՀԿ) առաջնորդ Օզգյուր Օզելը Ստամբուլում ելույթի ժամանակ ոստիկանությանը և քաղաքային իշխանություններին կոչ է արել զերծ մնալ ցուցարարների դեմ արցունքաբեր գազ կիրառելուց: Ականատեսների տվյալներով՝ ակցիայի ընթացքում մի քանի անգամ շտապօգնություն են կանչել։
Թուրքիայի նախագահի վարչակազմն իր հերթին հերքել է ոստիկանության կողմից ռետինե փամփուշտներ կիրառելու մասին մի շարք լրատվամիջոցների հաղորդումները: ՆԳՆ-ի տեղեկություններով՝ ցույցերի հետևանքով տուժել է իրավապահ մարմինների 16 աշխատակից:
Հիշեցնենք, որ Իմամօղլուն ձերբակալվել է կոռուպցիայի և կաշառակերության մեջ կասկածվող կազմակերպության գործով: Քաղաքական գործիչը հայտարարել է, որ մտադիր չէ նահանջել իշխանությունների ճնշման առաջ։
Նրա ձերբակալությունը դժգոհության ալիք է բարձրացրել՝ չնայած անվտանգության ուժեղացված միջոցառումներին և մինչև մարտի 23-ը Ստամբուլում հանրահավաքների արգելքին:
Թուրքիայի նախագահ Ռեջեփ Թայիփ Էրդողանը, առաջին անգամ մեկնաբանելով իրավիճակը, ընդդիմությանը մեղադրել է ոստիկանության և դատական համակարգի վրա ճնշում գործադրելու փորձերի մեջ՝ նշելով, որ կառավարությունը կենտրոնացած է երկրի հրատապ խնդիրների լուծման վրա:
Արդարադատության նախարար Յլմազ Թունչը նույնպես կոչ է արել զերծ մնալ փողոցային բողոքներից՝ ընդգծելով, որ Իմամօղլուի գործը Էրդողանի հետ կապ չունի:
Նախագահի աշխատակազմը հայտարարել է, որ պետության ղեկավարի հասցեին հնչող մեղադրանքները անհիմն զրպարտություն են:
Իմամօղլուն Էրդողանի հիմնական մրցակիցն է համարվում հնարավոր արտահերթ ընտրություններում։