ԵՐԵՎԱՆ, 19 մարտի – Sputnik. Շվեյցարիայի խորհրդարանի ազգային խորհուրդը (Մեծ պալատ) դեմ է քվեարկել Կիևին 4,8 մլրդ շվեյցարական ֆրանկ (5,5 մլրդ դոլար) լրացուցիչ մարդասիրական օգնություն հատկացնելու 2 միանման առաջարկներին: Տեղեկությունը հայտնում է ՏԱՍՍ-ը՝ հղում անելով երկրի խորհրդարանի կայքին։
Առաջարկություններին դեմ է քվեարկել խորհրդի պատգամավորներից 111–ը, կողմ՝ 73–ը, 4-ը ձեռնպահ են մնացել:
Արտաքին գործերի ազգային խորհրդի կոմիտեն նշել է, որ կառավարությունն Ուկրաինային արդեն 1,5 մլրդ ֆրանկի (1,7 մլրդ դոլար) վարկ է տրամադրել պակաս զարգացած երկրներին օգնություն ցուցաբերելու ծրագրերի շրջանակում: Կոմիտեն կարծում է, որ հավելյալ օգնության առաջարկներն ավելորդ են դառնում այդ համատեքստում։
Շվեյցարիայի ԱԳՆ ղեկավար Իգնասիո Կասիսի խոսքով՝ երկու առաջարկներն էլ խորհրդարան են ներկայացվել երկու տարի առաջ, այդ ժամանակից ի վեր շվեյցարական իշխանություններն արդեն զգալի միջոցներ են հատկացրել Կիևին:
2024 թվականի ապրիլի 10-ին Դաշնային խորհուրդը որոշել է մինչև 2036 թվականը Կիևին ֆինանսական աջակցություն ցուցաբերել 5 միլիարդ ֆրանկի (5,55 միլիարդ դոլար) չափով։ Կառավարության տվյալներով՝ համադաշնությունն Ուկրաինային արդեն մոտ 3 մլրդ ֆրանկ (3,3 մլրդ դոլար) է տրամադրել երկիրը վերականգնելու և այլ միջոցներ ձեռնարկելու համար։ Միայն միգրացիայի հարցերով պետական քարտուղարությունը մոտ 2,5 մլրդ ֆրանկ (մոտ 2,8 մլրդ դոլար) Է հատկացրել ուկրաինացի փախստականներին ընդունելու և աջակցելու համար: