ԵՐԵՎԱՆ, 16 մարտի – Sputnik. Թուրքիայի նախագահ Ռեջեփ Թայիփ Էրդողանը այսօր հեռախոսազրույցի ընթացքում կոչ է արել իր ամերիկացի գործընկեր Դոնալդ Թրամփին չեղարկել Անկարայի դեմ պատժամիջոցների փաթեթը։
Ինչպես հայտնում է ՌԻԱ Նովոստին՝ հղում անելով Թուրքիայի ղեկավարի վարչակազմին, նշվել է, որ սահմանափակումների վերացումը Անկարային թույլ կտա գնել F-35 կործանիչներ։
Էրդողանը Թրամփին ասել է, որ ակնկալում է, որ ԱՄՆ-ն քայլեր կձեռնարկի ահաբեկչության դեմ պայքարում՝ հաշվի առնելով Թուրքիայի շահերը:
Էրդողանը Թրամփին խնդրել է նաև Դամասկոսի դեմ պատժամիջոցները չեղարկել և աջակցելՍիրիայի նոր իշխանություններին։
«Ըստ Էրդողանի՝ Սիրիայում կայունությունը վերականգնելու, նոր վարչակազմի գործունեության և նորմալացման համար անհրաժեշտ է չեղարկել Սիրիայի դեմ պատժամիջոցները և համատեղ նպաստել խնդրի կարգավորմանը, ինչը կապահովի սիրիացիների վերադարձը իրենց տներ»,- նշում է հրատարակությունը։
2017 թվականին Թուրքիան պայմանագիր է կնքել Ռուսաստանի հետ՝ Ս-400-ի գնդի լրակազմի մատակարարման համար, որը ստացել է 2019 թվականին։ ԱՄՆ-ն պահանջում էր, որ թուրքերը հրաժարվեն ռուսական համակարգերից՝ հօգուտ Patriot-ի, սակայն Անկարան չհամաձայնեց դրան։ Որպես պատիժ՝ Վաշինգտոնը բացառեց Թուրքիային F-35 վերջին կործանիչների մատակարարման ծրագրից և պատժամիջոցներ սահմանեց պաշտպանական արդյունաբերության ղեկավարների նկատմամբ: Միացյալ Նահանգները նաև չեղյալ հայտարարեց Թուրքիայի հետ F-35-ի համատեղ հուշագիրը՝ ստորագրելով այն F-35 նախագծի մնացած յոթ գործընկերների հետ՝ Միացյալ Թագավորություն, Իտալիա, Նիդեռլանդներ, Ավստրալիա, Դանիա, Կանադա և Նորվեգիա: