ԵՐԵՎԱՆ, 14 մարտի – Sputnik. ՌԴ ՀՕՊ ուժերը հետ են մղել անօդաչու թռչող սարքերի հարձակումը, երկու անօդաչու խոցվել Բալաշիխայի երկնքում, երրորդը` Լենինսկիի Յուժնայա Բիտցա միկրոշրջանում։ Այս մասին հայտնել է Մոսկվայի մարզպետ Անդրեյ Վորոբյովը։
«Այսօր առավոտյան մեր ՀՕՊ–ը հետ է մղել անօդաչուների հերթական հարձակումը: Երկու անօդաչու խոցվել է Բալաշիխայի երկնքում, որոնցից մեկի բեկորներն ընկել են Դեմին Լուգ փողոցի մոտ գտնվող Իզմայլովո միկրոշրջանում կառուցվող շինհրապարակի վրա: Երրորդը` խոցվել է Լենինսկիի Յուժնայա Բիտցա միկրոշրջանում», – հայտնել է նա Telegram–ում։
Նրա խոսքով՝ բեկորներն ընկել են կառուցվող բազմահարկ շենքի վրա, որում դեռ ոչ ոք չի բնակվում։
«Նախնական տեղեկություններով՝ տուժածներ չկան։ Անօդաչուների ընկնելու վայրերում աշխատում են արտակարգ ծառայությունները», – հայտարարել է Մոսկվայի մարզպետը։
Ավելի վաղ Մոսկվայի քաղաքապետ Սերգեյ Սոբյանինը Telegram-ի ալիքում հայտնել էր, որ ՌԴ ՊՆ ՀՕՊ ուժերը հետ են մղել Մոսկվայի ուղղությամբ թռչող չորս անօդաչուների հարձակումը։
Հիշեցնենք, որ մարտի 11-ին Մոսկվան և Մոսկվայի մարզը ենթարկվել էին անօդաչու թռչող սարքերի զանգվածային հարձակման, ինչի հետևանքով երեք մարդ զոհվել էր, մոտ 20-ը վիրավորվել։ ՌԴ ՊՆ–ն հայտնել էր Մոսկվայի և Մոսկվայի մարզի երկնքում 91 անօդաչու թռչող սարքի ոչնչացման մասին։ Ընդհանուր առմամբ այդ գիշեր 337 անօդաչու էր խոցվել։