ԵՐԵՎԱՆ, 12 մարտի – Sputnik. Եվրասիական տնտեսական միությունը (ԵԱՏՄ) հաջողությամբ հաղթահարել է մի շարք գործոններ և դրանց բացասական հետևանքները, որոնք արտաքին մարտահրավեր էին դարձել միության երկրների համար։ Այս հայտարարությունն արել է Եվրասիական տնտեսական հանձնաժողովի (ԵՏՀ) էներգետիկայի և ենթակառուցվածքների նախարար Արզիբեկ Կոժոշևը ԵԱՏՄ-ի գործունեության 10-ամյակի կապակցությամբ միջազգային քննարկման ժամանակ։ Տեղեկությունը հայտնում է ԵՏՀ մամուլի ծառայությունը։
«Մի շարք գործոններ և դրանց բացասական հետևանքները միության համար արտաքին մարտահրավերներ էին դարձել, որոնք ԵԱՏՄ–ն հաջողությամբ հաղթահարել է։ Այդ մասին է վկայում նշված ժամանակահատվածի համար ՀՆԱ–ի մոտ 50% աճը` 1.6 տրլն դոլարից մինչև 2.4 տրլն դոլար։ Միևնույն ժամանակ փոխադարձ առևտուրը կրկնապատկվել է և կազմել մոտ 90 մլրդ դոլար, իսկ դրա մասնաբաժինը ԵԱՏՄ արտաքին առևտրի ընդհանուր ծավալում աճել մինչև 18,2%», – նշել է նա։
Կոժոշևի խոսքով` ԵԱՏՄ երկրների քաղաքացիների համար ավելի հարմարավետ պայմաններ են ստեղծվել կրթության, բժշկական օգնության, կենսաթոշակների նշանակման ու վճարման ոլորտներում։ Նախանշվել են գործարար համայնքի օգուտները, որոնց համար ԵԱՏՄ օրենքը ապրանքների ազատ տեղաշարժ և պետական գնումների հավասար հասանելիություն է նախատեսում:
Նա ընդգծել է նաև, որ այսօր առաջ են մղվում նավթի, գազի և էլեկտրաէներգիայի ընդհանուր շուկաների հարցերը, ինչը կապահովի էներգառեսուրսների մատչելիությունն ու ԵԱՏՄ երկրների զարգացումը։
Որոշվում են մատակարարումների դիվերսիֆիկացման և նոր տրանսպորտային միջանցքների ներուժի ընդլայնման խնդիրները, ինչպիսիք են Հյուսիս-հարավ տրանսպորտային միջանցքը և «Մեկ գոտի, մեկ ճանապարհ» նախագծի շրջանակում Չինաստանի հետ համագործակցությունը: