ԵՐԵՎԱՆ, 12 մարտի – Sputnik. Արագած լեռան վրա ձնահյուսի պատճառով անհետ կորած լեռնագնացը դեռ չի հայտնաբերվել։ Տեղեկությունը հայտնում է ՆԳՆ փրկարար ծառայությունը։
Երեկ` մարտի 11-ին, հայտնի դարձավ, որ Արագած լեռան հյուսիսային գագաթ է բարձրացել 9 անձից բաղկացած արշավախումբ և մնացել ձնահյուսի տակ։ Նրանցից 8–ը կարողացել են դուրս գալ, 1-ն անհետ կորել է։ 8 անձինք հոսպիտալացվել են թեթև ու միջին պոլիտրավմաներով։
«Ժամը 06։00-ի դրությամբ որոնողափրկարարական աշխատանքները մեկնարկել են։ Դեպքի վայր են մեկնել ՆԳՆ ՓԾ մարզային փրկարարական վարչության օպերատիվ խումբը, հրշեջ-փրկարարական ջոկատից մեկ մարտական հաշվարկ և մեկ օպերատիվ խումբ»,– ասված է հաղորդագրությունում։
Ըստ փրկարար ծառայության` որոնողափրկարարական աշխատանքներում ներգրավվել են 29 փրկարարական ծառայող, Արագածի ՀԷԿ-ի մեկ աշխատակից և Ալպինիզմի և լեռնային տուրիզմի հայկական ֆեդերացիայից 4 ալպինիստ։
Արագած լեռան հյուսիսային գագաթին տեղի ունեցած ձնահյուսի հետևանքով տուժածներից մեկը News.am–ին պատմել է, որ արդեն մոտ են եղել գագաթին, երբ ձնահյուս է սկսվել, ձյունը լցվել է նրանց վրա, և մոտ 400 մետր ձնահյուսի մեջ գլորվել են ներքև։ Իսպանիայի քաղաքացին պատմել է, որ Հայաստան են եկել դահուկներով սահելու նպատակով։