ԵՐԵՎԱՆ, 6 մարտի - Sputnik. Առաջիկա ամսվա ընթացքում մեքսիկական ապրանքների նկատմամբ, որոնց շրջանառությունը կարգավորվում է ԱՄՆ-Կանադա-Մեքսիկա առևտրային համաձայնագրով (USMCA/T-MEC), նոր մաքսատուրքեր չեն կիրառվի: Այս մասին հայտարարել է նախագահ Կլաուդիա Շեյնբաումը ԱՄՆ նախագահ Դոնալդ Թրամփի հետ բանակցություններից հետո։
Մարտի 4-ին ԱՄՆ-ն 25 տոկոս մաքսատուրք է սահմանել Մեքսիկայից և Կանադայից ապրանքների ներմուծման համար, ինչպես նաև նոր մաքսատուրքեր՝ Չինաստանից ապրանքների համար՝ դրանց դրույքաչափը բարձրացնելով մինչև 20 տոկոս: ԱՄՆ-ում մտադիր են նաև մաքսատուրքեր սահմանել Եվրամիությունից ապրանքների համար, «հայելային» մաքսատուրքեր այն երկրների դեմ, որտեղ ամերիկյան ապրանքների մաքսատուրքերն ավելի բարձր են, քան Ամերիկայում:
«Մեքսիկան պարտավոր չի լինի T-MEC-ի շրջանակներում տուրքեր վճարել բոլոր ապրանքների համար: Այս համաձայնագիրը գործում է մինչև ապրիլի 2-ը, երբ ԱՄՆ-ն կհայտարարի բոլոր երկրների համար փոխադարձ մաքսատուրքերի սահմանման մասին»,-գրել է Շեյնբաումը X սոցցանցում։
Նրա խոսքով՝ Մեքսիկան և ԱՄՆ-ն աննախադեպ արդյունքների են հասել միգրացիայի և թմրանյութերի շրջանառության դեմ պայքարի ոլորտում:
«Մենք եկել ենք այն համոզման, որ մեր աշխատանքն ու համագործակցությունը աննախադեպ արդյունքների են հանգեցրել՝ մեր ինքնիշխանությունը հարգելու շրջանակներում։ Մենք կշարունակենք փոխգործակցությունը, հատկապես միգրացիայի և անվտանգության հարցերի, ներառյալ ԱՄՆ ֆենտանիլի, ինչպես նաև Մեքսիկա զենքի ապօրինի ներկրման կրճատման շուրջ»,-նշել է Շեյնբաումը։
Նա շնորհակալություն է հայտնել Թրամփին հիանալի և հարգալից զրույցի համար:
T-MEC-ի կամ USMCA-ի պայմանների համաձայն (այդպես են անվանում Հյուսիսային Ամերիկայում ազատ առևտրի մասին պայմանագիրը), ԱՄՆ-ի, Մեքսիկայի և Կանադայի միջև շատ ապրանքներ վաճառվում են առանց մաքսատուրքերի, պայմանով, որ պահպանվեն ապրանքների ծագման կանոնները և այլ ստանդարտներ: