ԵՐԵՎԱՆ, 27 փետրվարի – Sputnik. 95 տարեկանում մահացել է «Օսկարի» և «BAFTA»-ի կրկնակի դափնեկիր` ամերիկացի դերասան Յուջին (Ջին) Հեքմենը, նրա հետ մահացած են գտել նաև կնոջը։ Այս մասին հայտնում է «Santa Fe New Mexican» պարբերականը։
«Լեգենդար դերասան, կրկնակի օսկարակիր, գրող Ջին Հեքմենին և նրա կնոջը` Բեթսի Արակավային, մահացած են գտել փետրվարի 26–ի երեկոյան Սանտա Ֆեի իրենց տանը», - ասվում է հաղորդագրության մեջ։
Դերասանը 95 տարեկան էր։ Նրա մահը հաստատել է Սանտա Ֆե շրջանի շերիֆ Ադան Մենդոզան` հայտարարելով, որ զույգի հետ միասին անշնչացած են հայտնաբերել նաև նրանց շանը։
Ոստիկանությունը չի հայտնում դերասանի և նրա կնոջ մահվան պատճառը՝ նշելով, որ մահը բռնության հետևանք չի եղել։
Ջին Հեքմենը հայտնի էր «Ֆրանսիական կապավորը», «Միսիսիպին կրակի մեջ», «Չներվածը», «Բոսոր մակընթացություն», «Թշնամու թիկունքում», «Սրտակերները» և այլ ֆիլմերում իր մարմնավորած դերերով: Դերասանը կարիերայի ավարտի և կինոյից հեռանալու մասին հայտարարեց 2004 թվականին։