ԵՐԵՎԱՆ, 21 փետրվարի – Sputnik. Հայաստանյան որոշ բուհերում, ինչպես նաև դպրոցներում, ձյան տեղումների պատճառով դասերը չեղարկվել են։ Ուսումնական հաստատությունների մի մասն անցել է հեռավար ուսուցման։
Փետրվարի 20-ին սկսած ձյան տեղումները տրանսպորտային կոլապսի պատճառ են դարձել․ Երևանում անգամ որոշ փողոցներ ժամանակավորապես փակվել են։ Տեղումներն այս պահին ևս շարունակվում են։
Մասնավորապես, Երևանի պետական համալսարանը հայտարարություն է տարածել, որ այսօր անցնելու են հեռավար ուսուցման։ ԵՊՀ-ում փետրվարի 21-ին նշանակված քննությունները տեղափոխվել են փետրվարի 24, իսկ բաց թողնված բոլոր դասերը կլրացվեն հաջորդ շաբաթ: Ռուս-հայկական (Սլավոնական) համալսարանը ևս անցել է հեռավար ուսուցման:
Ինչ վերաբերում է Երևանի պետական բժշկական համալսարանին և Երևանի թատրոնի և կինոյի պետական ինստիտուտին, ապա այս բուհերի ղեկավարությունը հայտարարել է, որ բոլոր քննություններն ու դասերը չեղարկվում են եղանակային պայմանների պատճառով:
Մյուս բուհերը չեն չեղարկել դասերը՝ հայտարարելով, որ դասերին ուսանողների բացակայությունը կհամարվի հարգելի։