ԵՐԵՎԱՆ, 19 փետրվարի – Sputnik. ՌԴ նախագահ Վլադիմիր Պուտինի և ԱՄՆ նախագահ Դոնալդ Թրամփի բանակցությունները կարող են տեղի ունենալ փետրվարին կամ ավելի ուշ։ ՌԴ նախագահի մամուլի քարտուղար Դմիտրի Պեսկովն այս մասին ասել է լրագրողներին։
«Արևմտյան լրատվամիջոցները շատ բան են գրում, մեր լրատվամիջոցները շատ բան են գրում... Կարող է լինել, կարող է և չլինել», - ասել է Պեսկովը՝ պատասխանելով հարցին, թե արդյոք Պուտինի և Թրամփի բանակցությունները կարող են տեղի ունենալ մինչև փետրվարի վերջ։
Միաժամանակ նա նշել է, որ երկու երկրների ԱԳՆ–ների գծով որոշակի նախապատրաստություն կպահանջվի։
Պեսկովի խոսքով` Ռուսաստանի և ԱՄՆ-ի հարաբերությունները վերականգնման կարիք ունեն, ԱՄՆ նախկին վարչակազմը նպատակաուղղված վնաս էր հասցնում դրանց։
Ինչ վերաբերում է Ուկրաինայի հարցով ՌԴ բանակցողի նշանակմանը, ապա Պեսկովը նշել է, որ ՌԴ նախագահը որոշում կկայացնի այն բանից հետո, երբ դա կանի ԱՄՆ-ն։
«Երբ ամերիկյան կողմը կորոշի, կախված նրանից, թե ով կլինի դա, մեր նախագահը որոշում կկայացնի մեր ներկայացուցչի վերաբերյալ»,- ասել է Պուտինի խոսնակը։
Նա ԱՄՆ-ի հետ բանակցությունները կարևոր քայլ է որակել ուկրաինական կարգավորման համար։
Հիշեցնենք` փետրվարի 18-ին Ռիադում ռուս-ամերիկյան բանակցություններ են կայացել: Ռուսաստանը ներկայացրել են ՌԴ արտգործնախարար Սերգեյ Լավրովը և նախագահի օգնական Յուրի Ուշակովը, իսկ ԱՄՆ-ն՝ նախագահի ազգային անվտանգության հարցերով օգնական Մայք Ուոլցը, պետքարտուղար Մարկո Ռուբիոն և նախագահի` Մերձավոր Արևելքի հարցերով հատուկ բանագնաց Սթիվեն Վիտկոֆը:
Հանդիպումը տևել է ավելի քան չորս ժամ։ Կողմերը երկխոսությունը գնահատել են որպես հարգալից և լուրջ՝ այն որակելով քայլ դեպի առաջ։