ԵՐԵՎԱՆ, 10 փետրվարի – Sputnik. Ադրբեջանի ԱԳՆ-ն Ռուսաստանի Պետդումայի պատգամավոր Նիկոլայ Վալուևին ներառել է այն անձանց ցուցակում, որոնց արգելվում է մուտք գործել Ադրբեջանի տարածք։
«Պետդումայի զբոսաշրջության կոմիտեի առաջին տեղակալ Նիկոլայ Վալուևի` Ադրբեջանի և ադրբեջանական ժողովրդի հասցեին հնչեցրած վիրավորական արտահայտություններն ու սպառնալիքները բացարձակապես անընդունելի են։ Նշված պատգամավորի արտահայտությունների պատճառով նրա անունը ներառվել է այն անձանց ցանկում, որոնց մուտքը երկիր արգելված է», - ասել է ԱԳՆ պաշտոնական ներկայացուցիչը։
Նա նաև նշել է, որ սա առաջին դեպքը չէ, երբ Ադրբեջանը ՌԴ Պետդումայի պատգամավորներին ընդգրկում է անցանկալի անձանց ցուցակում. ավելի վաղ «Ադրբեջանի ինքնիշխանության և տարածքային ամբողջականության դեմ գործունեության համար» արգելվել էր Պետդումայի ԱՊՀ հարցերով կոմիտեի նախագահի առաջին տեղակալ Կոնստանտին Զատուլինի և ընտանիքի պաշտպանության կոմիտեի ղեկավարի տեղակալ Վիտալի Միլոնովի մուտքը։
ԶԼՄ-ները հայտնում են, որ Վալուևը, ի պատասխան Ադրբեջանի ԱԳՆ-ի նոտայի՝ Բաքվում ռուսական տան գործունեությունը դադարեցնելու մասին, առաջարկել է փակել Ռուսաստանում ադրբեջանական սփյուռքյան կազմակերպությունները, սահմանափակել ադրբեջանցիների բիզնեսը և այլ միջոցներ ձեռնարկել:
Հիշեցնենք` Ռոսսոտրուդնիչեստվոյի ղեկավար Եվգենի Պրիմակովը հայտնել էր, որ Բաքուն պահանջել է փակել Ադրբեջանում գործող Ռուսական տունը` իրավաբանական գրանցման բացակայության պատճառով: Նա նաև հայտնել էր, որ Ռուսական տունը պետք է մեկուկես ամսվա ընթացքում ազատի վարձակալած տարածքը, քանի որ սեփականատերը նախատեսում է այն վաճառել։